کوئٹہ۔ 26 جون (اے پی پی) چیئرمین قائمہ کمیٹی دفاعی پیدوار سینیٹر محمد عبدالقادر پارینے کہ او چیئرمین قائمہ کمیٹی دفاعی پیدوار نا گچین کاری نا بابت صادق سنجرانی و خالد مگسی نا اوڑآ پت انا درشانی آ است انا حب اٹ منت وار ءِ داکان مست او بطور چیئرمین قائمہ کمیٹی پیٹرولیم و قدرتی وسیلہ تینا زمواری تے پورو کرساکرے، اوپارے کہ او دیانتداری و غٹ تر لائخی تے کاریم اٹ اتسا قومی خذمت آ یخین تخک۔ داڑے جاری مروک اسہ بیان اسے ٹی سینیٹر محمد عبدالقادر پارے کہ انت کہ زمواری اس مرے سیاست دان تے ہی آخا ہر پاکستانی تینا غٹ تر لائخی تے کاریم اٹ اتسا ملک وقوم انا خذمت نا چرجوئی ءِ برجاتخے، ملک گھمبیر چیلنج آتون مون تننگ ءِ دا چیلنج آتون مون تننگ کن غٹ ءِ اواری اٹ مون آ ہنوئی مریک بوجوہ ننا حکومت قومی شونداری نا ررفتار دنیا نا ایلو ملک آتا نسبت سست روی نا گواچی مسنے ولے داسہ وخت بسنے کہ نن دہشت گردی تون اوار غٹ چیلنج آتامقابلہ ءِ کننگ اٹ تینا گچین و فعال کڑد ءِ ادا کین۔ اوپارےکہ قومی شونداری نا کسر اٹ بروک بے گرج اڑاند آتے چٹفنگ نا سخت گرج ءِ داارفع مسخت نا دوءی کننگ کن ننے بحیثیت قوم سخت خواری کروئی مریک، حکومت آتے تینا کاریم نا کچ اٹی ودکی کروئی مریک۔ چندی محکمہ غاتا کارکڑد نا جاچ ءِ ہلوئی مریک دا محکمہ غاتیٹی وڈی خوری و تساہل پسندی نا رجحان ءِ چٹفوئی مریک۔ ملک داوخت آ لاتعداد ویل آتون مون تننگ ءِ ، ہر پاکستان دا مشکل آتیان ملک ءِ کشنگ کن تینا پبی کڑد ءِ ادا کے۔ چیئرمین قائمہ کمیٹی پارے کہ ملک اٹی شونداری وشونہالی اسہ وڑ باید ے مرے ، مستین نا حکومت آک بلوچستان نا الس نا ویل آتیا زیات چکار کتور ہرانا سوب آن صوبہ نا الس اٹی احساس محرومی ودسا ہنا، داوڑنا رجحانک وفاقیت کن بھازنسخان دہ مریرہ، سی پیک ملک انا زرگزرانی شہ رگ نا درجہ تخک، دا عظیم الشان ڈٹ انا پوروی و سرسہبی بلوچستان نا الس و وسیلہ غاتا اہم ءُ کڑ د اسے پاکستان دفاعی پیدوار اٹی ڈیہہ اٹی نمان ہند اس تخک ننے دا ہند ءِ پین گچین کروئی مریک تانکہ ملکی دفاعی باندات آتیا چکار کننگ مرے۔
