اسلام آباد۔ 25 جون (اے پی پی) مسلم لیگ (ن) نا باسک شاہد عثمان ابراہیم پارینے کہ ہراوڑ نن ملک ءِ خواتہ مننگ آن بچفینن ہمووڑ ملک آن ہروڑنا تنکی تے ہم چٹفنہ۔ سے شنبے نادے آ قومی اسمبلی ٹی بجٹ آ شرہ ٹی بشخ ہلسا اوپارے کہ داڑے بجٹ آ شرہ ٹی منفی و مثبت پلوآتے تالان کننگا، ولے داہم اسہ حقیقت اسے کہ مشکل حالیت آتیٹی داکان جوان ءُ بجٹ اس پیش کننگ متوکہ۔ ہمووخت ءِ یات کبو ہراتم ملک وام تیٹی ڈبنگوک ئس و خواتہ مننگ نا خڑک آ ئس، کنا جماعت ہمووخت آ دافیصلہ ءِ کرے کہ نن تینا سیاست ءِ آخا ریاست ءِ بچفنہ، و ولدا نن مون آبرسا پاکستان ءِ بچفین و نن اینودا ہیت ءِ گمر اٹ پاننگ کینہ کہ کنا جماعت نا سرکڑدہ غاک سخت خواری و پبی کوشست اٹ پاکستان ءِ خواتہ مننگ آن بچفیر و سہی آ کسر آ شاغار۔ اوپارے کہ ہراوڑ نن ملک ءِ خواتہ مننگ آن بچفین ہموڑے نن پاکستان ءِ ہم بچفنہ۔ اوپارے کہ جی ڈی پی ٹی کشت وکشارنا بشخ 24 درسد ءِ، ننا اِرا تہائی آبادی کشاری بشخ اتون گنڈوک ءِ۔ ہنداسوب آن بجٹ اٹی کشاری بشخ اکن پنچ ارب روپئی جتا کننگانے۔ اوپارے کہ افراط زر انا کچ 38 درسد آن 11.8 درسد اسکان بسنے، سٹاک مارکیٹ پاکستان نا تاریخ اٹی پوسکن ءُ ریکارڈ اس جوڑ کننگ ءِ داکان مست اسٹاک ایکسچینج نا انڈیکس 78 ہزار نا کہول آ ہم ہنتنے۔ وزیرخزانہ ہرا پنجرجاتی اصلاحات نا ذکر ءِ کرینے اوڑآ عملدرآمد کننگک حکومت تینا خڑچ آتے کم کیک۔
