لاہور۔ 25 جون (اے پی پی) بنجائی وزیر دفاع خواجہ محمد آصف پارینے کہ آپریشن عزم استحکام نا مسخت دہشت گردی نا پورو چٹفنگ ءِ، آپریشن عزم استحکام نیشنل ایکشن پلان نا تسلسل ءِ ہرانا ہچ ءُ سیاسی عزم اس اف، آپریشن عزم استحکام نا مستین نا آپریشن آتون موازنہ ءِ کننگ درست اف، اودیم معلومداری نا بنداو آ کارروائی مریک، آپریشن نا خدوخال امنائی سلاہ غان پد طے کننگک، دہشت گردی نا مون ءِ توننگا تو مچ آملک اٹی اونا اثر مننگ کیک، آپریشن نا سرسہبی کن غٹ ادارہ و سیاسی قوت آتا نیام اٹ امنائی سلاہ المی ءِ ، ہنداسوب آن غٹ فریق آک کانود نافذ کروک آ ادارہ غاتا مخ تفیءِ کیر۔ او سے شنبے نادے آ ماڈل ٹاؤن لاہور اٹی پریس کانفرنس آن تران کریکہ۔ وزیردفاع خواجہ محمد آصف پارے کہ ایپکس کمیٹی نا کنڈآن عزم استحکام آپریشن نا بناءِ کننگ نا فیصلہ ءِ کننگا ہراٹی غٹ وزیراعلاک ساڑی ئسر و اسٹ اس ہم اونا مخالفت ءِ کتو۔ دادے اسمبلی ٹی پیش کرسا داڑا شرہ کننگک، داآپریشن نا بابت اپوزیشن نا غٹ گڑتی تے مرکننگک ہنداسوب آن غٹ اختیار ارباب داآپریشن ءِ سپورٹ کیر۔ اوپارے کہ داقومی سلامتی نا باندات ءِ و میڈیا ہم تینا کڑد ءِ بایدے اداکے، دہشت گردی قومی ویل ءِ و غٹ ءِ اواری اٹ داڑتون مون تروئی مریک۔ اومستی پارے کہ داآپریشن نا سوب آن ہچ ءُ نقل مکانی اس مفک۔ خواجہ محمد آصف پارےکہ آپریشن عزم استحکام نا باندات غٹ ریسہ غاتیان پد پارلیمنٹ اٹی پیش کننگک ہراڑے حزب اختلاف نا غٹ جماعت آتے پورو شرہ نا موقع تننگک۔
