کوئٹہ۔ 25 جون (اے پی پی) وزیراعلیٰ بلوچستان میر سرفراز بگٹی تون سے شنبے نادے آ داڑے پولیو اوور سائیٹ بورڈ انا سروک و بل اینڈ ملینڈا گیٹس فاؤنڈیشن نا گلوبل ڈویلپمنٹ ڈویژن نا صدر ڈاکٹر کرسٹوفر الیاس نا کماشی ٹی نمائندہ ڈل اوڑدہی کرے و صوبہ ٹی انسداد پولیومہم نا بابت گپ وتران کرے، اوڑدہی ٹی صوبہ ٹی انسداد پولیو مہم ءِ مربوط کننگ آ امنا کننگا ۔ ڈل اتون گپ وتران کرسا وزیراعلیٰ میر سرفراز بگٹی پارے کہ بلوچستان ءِ پولیو آن پاک کننگ کن سنبرینگوک اُن، جہانی شریدار و قومی ادارہ غاتون اواری اٹ صوبہ غان پولیو نا چٹفنگ کن کوشست آتے بارآور کننگک، بلوچستان اٹی انسداد پولیو مہم آ متعین ورکرآتے پورو سیکورٹی تننگ انگ ءِ ، بنجائی و صوبائی حکومت آک المی تکنیکی مہارت فراوان کرسا پولیونا چٹفنگ نا مہم نا سرسہبی کن سنبرینگوک ءُ ۔ ڈاکٹر کرسٹو فرالیاس نا کماشی ٹی ڈل انا باسک آک وزیراعلیٰ بلوچستان ءِ پولیو نا چٹفنگ کن برجاگام گیج آتیان معلومدار کریر و دامرض انا نجات کن حکومتی عزم انا ستاءِ کریر ۔ ڈل رکھی ٹیکہ غاتا مہم اٹی مون تروک ویل آتے ہم مون آتخا۔ وزیراعلیٰ باوری کرفے کہ صوبہ ٹی انسداد پولیو مہم نا ٹیم تے مون تروک مشکل و ویل آتے ایسر کرسا مہم ءِ مربوط وڑاٹ مون آ درسا درکار ہدف آتا دوئی کننگ ءِ پک کننگک۔ اوڑدہی ٹی صوبائی وزیر جا ن جوڑی سردار زادہ فیصل خان جمالی و ایلوکمامدارآک ہم ساڑی ئسر۔ اوڑدہی نا ایسر آ وزیراعلیٰ ءِ ڈاکٹر کرسٹوفرالیاس سوینئر اس پیش کرے۔
