اسلام آباد۔ 24 جون (اے پی پی) جے یوآئی(ف) انا باسک محمد عثمان بادینی پارینے کہ بلوچستان اسہ پسماندہ ءُ علاقہ سے، ننا طالب علم آتے لاہور، کراچی و پشاور تون اوار ایلو بھلا شار تا تعلیمی ادارہ غاتیٹی تعلیم نا آسراتی فراوان کننگے۔ دوشنبے نادے آ بجٹ 2024-25ء آ شرہ ٹی بشخ ہلسا اوپارے کہ نن غٹ سودی نظام تون گنڈوک اُن۔ بلوچستان پاکستان نا 43 درسد علاقہ ءِ۔ ہموڑے سڑک آتا حالیت ہندن ءُ کہ ہر شاہراہ خونی شاہراہ جوڑ مسنے۔ اوپارے کہ پاکستان نا ہر سیاسی جماعت بلوچستان آن معافی تو خواہک ولے بلوچستان کن عملی وڑاٹ ہچ ءُ کاریم اس کننگتنے۔ اوپارے کہ ریکوڈک آ کاریم نا بنامننگ والا ءِ ، کنا خواست ءِ کہ بلوچستان نا چناتے ملک انا ایلو بشخ آتیٹی ٹیکنیکل ادارہ غاتیٹی تربیت تننگے۔ اوپارے کہ بلوچستان اسہ پسماندہ علاقہ اسے نن تون اسلام آباد کراچی پشاور و لاہور آنبار آسراتی اف ولے ننے آ خراج اسلام آباد و کراچی آنبار خلنگ انگ ءِ۔ اوپارے کہ دادیوان اٹ ساڑی ہرباسک آ فرض مریک کہ او بلوچستان نا بابت ننتون تفر۔ اوپارے کہ فائلر و نان فائلر ناایشو آ ننے ہچ ءُ اعتراض اس اف ولے مچ آ پاکستان نا مخلوق خراج نیٹ اٹ بایدے بریر۔ ہرافک خراج تفسہ اوفتیان خراج ہلنگے۔ اوپارے کہ بلوچستان ءِ معافی تا گرج اف بلوچستان ءِ اونا حق ءِ تننگے۔ بلوچستان نا طالب علم آتے پنجاب کراچی و کے پی کے تعلیمی ادارہ غاتیٹی تعلیم تننگے۔
