اسلام آباد۔ 24 جون (اے پی پی) سنی اتحاد کونسل نا باسک غلام محمد لالی پارینے کہ غزہ نا مظلوم فلسطینی تا کمک کن پارلیمنٹ اٹ اسہ فنڈ اس جوڑ کننگے و داہیت انا جاچ ءِ ہلنگے کہ ہراوڑ ننا اوفتا کمک ءِ کننگ کینہ، اوآئی سی تون اوار مچ آ عالم اسلام فلسطین نا مظلوم تا کمک ءِ کننگ اٹ بے سہب مسنو۔ دوشنبے نادے آ بجٹ 2024-25ء آ شرہ ٹی بشخ ہلسا اوپارے کہ غزہ نا چنابزرگ زالبول و غٹ مسلمان تے اسہ بھلو وخت اسے آن بےکچ مشکل مون تروک ءِ، کس اس اوفتا کمک ءِ کننگ کن اف۔ اوپارے کہ عالم اسلام نا داخہ در بے وسی ءِ مہالو خنتنون۔ او آئی سی ہم دا بابت کڑد ادا کننگ اٹ بے سہب مسنے۔ اوپارے کہ ننے اللہ تعالیٰ نا حضور حاضر مروئی ءِ و ننے تینا دا کڑد انا حساب ءِ تروئی مریک۔ اوپارے کہ غزہ نا مسلمان تا کمک کن قومی اسمبلی ٹی اسہ فنڈ اس جوڑ کننگے و داہیت انا جاچ ءِ ہلنگے کہ ہراوڑنن غزہ نا مسلمان تا کمک ءِ کننگ کینہ۔ اوپارے کہ کمُند نا کشارگرآتے مل مالک آک بھلو وخت اسکان ادائیگی کپسہ۔ اوخواست کرے کہ فیصل آباد نا سڑک گیس وایلو شونداری کاریم تے پورو کننگے۔
