جدہ۔ 13 جون (اے پی پی) سعودی عرب نا ولی عہد و وزیراعظم شہزادہ محمد بن سلمان جدہ ٹی یوکرین نا صدر ولادیمیر زیلنسکی نا خیرمقدم ءِ کرینے۔ ایس پی اے نا رداٹ اوڑدہی ٹی ہڑتوم آ سنگت ملک آتا نیام اٹ ہڑتوم آ کنڈآتا تعلقداری نا جاچ و یوکرینی تنکی نا حالیت آتیا گپ وتران کننگا۔ سعودی ولی عہد تنکی نا ایسری کن غٹ جہانی کوشست آتا بابت مملکت نا است خواہی و سپورٹ نا درشانی ءِ کرے۔ تنکی ٹی انسانی اثرآتے کم کننگ نا وڑوڈول آتیا گپ وتران کرے۔ یوکرینی صدر مملکت نا دورہ ءِ کننگ و سعودی ولی عہد تون اوڑدہی آ خوشی نا درشانی ءِ کرے۔ داوخت آ سعودی وزیرتوانائی شہزادہ عبدالعزیز بن سلمان، نیشنل گارڈ انا وزیر شہزادہ عبداللہ بن بندربن عبدالعزیز ، وزیر دفاع شہزادہ خالد بن سلمان، وزیرخارجہ شہزادہ فیصل بن فرحان، وزیر مملکت، کابینہ نا باسک و قومی سلامتی نا سلاہکار ڈاکٹر مساعد ئسک ہم ساڑی ئسر۔
