بنجائی بجٹ اٹی خراج بنداو ءِ ودفنگ، زرگزران نا دستاویز بندی آ چکار کننگانے، کم کٹیا والا تپہ غاتے رکھ فراوان کننگا، جی ایس ٹی ءِ 19 درسد کننگ نا سلاہ غا سجفپننگ انگ ءِ، وزیرخزانہ محمد اورنگزیب

اسلام آباد۔ 13 جون (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ پوسکن آ مالی سال انا بنجائی بجٹ اٹی خراج نا بنداو ءِ دفنگ، زرگزران نا دستاویز بندی و ڈیجیٹلائزیشن آ چکار کننگانے، جنرل سیلز خراج ءِ 18 درسد آن ودفسا 19 درسد کننگ نا ہچ ءُ سلاہ سے آ سجفپننگ انگ ءِ، پیٹرولیم ڈویلپمنٹ لیوی نا اطلاق دمدستی وڑاٹ آخا بلکن پدریسہ کننگک، جی ڈی پی و افراط زر انا ہدف آک حقی  ءُ، 12 ہزار ارب نا لیکیج آتے بند کننگ کن گام گیج آتا چرجوئی برجاءِ، بجٹ اٹ کم کٹیا والا تپہ غاتے رکھ فراوان کننگانے، نجکاری نا عمل آ سیوتی جماعت آتون سلابت اٹ باندات آتے مون آ دننگ انگ ءِ، آئی ایم ایف تون سٹاف کہول آ معاہدہ جولائی اسکان مننگ نا اومیت ءِ، نان فائلرآتا اختراع ءِ ملک آن چٹفوئی مریک۔ پنچ شنبے نادے آ وزیر مملکت علی پرویز ملک، سیکرٹری خزانہ امداد اللہ بوسال و چیئرمین ایف بی آر امجد زبیر ٹوانہ تون اوار پوسٹ بجٹ پریس کانفرنس آن تران کرسا وزیرخزانہ پارے کہ پوسکن آ مالی سال انا بنجائی بجٹ اٹی خراج نا بنداو  ءِ ودفنگ آ چکار کننگانے، پاکستان اٹ داوخت آ جی ڈی پی نا تناسب اٹ خراج آتا کچ 10 درسد نا خڑک ءِ ہراپائیدار اف، بروک آ اِرا مسہ سال اٹی جی ڈی پی نا تناسب آن خراج آتا کچ 13 درسد اسکان دننگ نا کوشست کینہ، غیردستاویزی زرگزران نا چٹفنگ ہم حکومتی اولیت آتیٹی اوار ءِ، دا مسخت کن ڈیجیٹلائزیشن نا عمل ءِ مون آ دننگ انگ ءِ، داڑآن خراج نانظام اٹی انسانی نیام تمنگ ءِ کم کننگک ہراڑآن نئے بیرہ ریونیوٹی ودکی مریک بلکن شفافیت ہم بریک۔ وزیرخزانہ پارےکہ زیات کٹیاوالاتیا زیات و کم کٹیا والا تپہ غاتیا کم خراج خلنگانے، نا ن فائلرآتیکن کاروباری ٹرانزیکشن آ خراج نا کچ اٹی نمان ودکی کننگانے و گڑاس ہند آتیا دا کچ ءِ 45 درسد اسکان ودفنگانے، ننے نان فائلرآتا اختراع ءِ داملک آن چٹفوئی مریک ، بجٹ اٹ کم کٹیا والا تپہ غاتے رکھ فراوان کننگانے۔ وزیرخزانہ پارے کہ داہمو پنچ بنداوی اصول آک ءُ ہرافتا بنداو آ بجٹ ءِ ترتیب تننگانے۔ اوپارے کہ پیٹرولیم ڈویلپمنٹ لیوی نا حد ءِ 60 روپئی آن ودفسا 80 روپئی کننگ نا سلاہ ءِ، دادے اولیکو دے آن خلنگ پننگک و دا ودکی بتدریج مریک، دابابت حکومت تیل انا نہاد نا چاروکی ءِ کیک تانکہ مخلوق آ کم آن کم بھاریم شاغنگ مرے۔ وزیرخزانہ پارے کہ تنخواہ تا سلیب اٹی 50 ہزار ماہانہ تنخواہ غا خراج استثنیٰ برقرار ءِ، ہندا وڑ ٹاپ سلیب آ ہم خراج نا کچ اٹی بدلی کننگتنے، حساب وکتاب دُن تو جم وڑاٹ ودفنگانے ولے انفرادی وڑاٹ بھاریم زیات اف۔ وزیرخزانہ پارےکہ ریٹیلرآتے خراج نا دنگ اٹ اتنگ المی ءِ تانکہ ایلو تپہ غاتیا خراج نا بھاریم کم  مرے، اپریل اٹی رضاکارانہ رجسٹریشن نا رداٹ بیرہ 75 پوریاگر رجسٹرییشن کرفیسر، مئی ٹی ایف بی آر شش شار آتیٹی گام گیج آتا بناءِ کرے ہراٹی داتم اسکان 31 ہزار ریٹیلرآتا رجسٹریشن مسنے، داعمل برجاسلک و یکم جولائی آن ریٹیلر آتیا خراج نا اطلاق مریک۔ وزیرخزانہ پارے کہ داوخت آ 9ٹریلین روپئی نا کرنسی نا زیرگردش ءِ، ڈیجیٹلائزیشن نا کمک اٹ باندات سہی مننگ کیرہ، ننا کوشست ءِ کہ کیش ٹرانزیکشن ءِ کم آن کم و چٹفنگے، پوائنٹ آف سیل رجسٹریشن نا چرجوئی نا دُوارہ بناءِ کننگک۔ وزیرخزانہ پارے کہ فری لانسرآتا بابت پاکستان دنیا نا مسٹ میکو بھلا ملک ءِ، بروک آ مالی سال انا بجٹ اٹی آئی ٹی نا مون آ دننگ کن کرنٹ و ڈویلپمنٹ ہڑتوم آ پڑ تیا نمان فنڈ جتا کننگانے۔ ڈیجیٹل انفراسٹرکچر ءِ گچین کننگک، داوخت آ ننا آئی ٹی نا برآمدات3.5 ارب ڈالر  ءُ ہرافتے 7 آن ہلیس 8 ارب ڈالر اسکان ودفنگ مریک۔ وزیرخزانہ پارے کہ سرکاری بشخ انا سالانہ شونداری پروگرام اٹی برجاڈٹ آتیاچکار کننگانے و 81 درسد فنڈ ہموڈٹ آتیکن جتا ءِ ہرا پوروی نا خڑک آٹی ءُ، پوسکن آ ڈٹ آتیکن فنڈ جتا کننگ نا کچ 19 درسدءِ، اوفتے ٹی دیامیر، داسو و بھاشاڈیم کون آ ڈٹ آک اوار ءُ ۔ اسہ سوج اسے آ وزیرخزانہ پارے کہ ڈی اے پی آ خراج اٹی ہچ ءُ بدلی اس کننگتنے، درآمدی ٹیکٹر آتیا 10 درسد خراج آن 7 درسد خراج مہالو آن لاگوئس و حقی ودکی بیرہ 3 درسد نا خڑک ءِ۔ سیکرٹری خزانہ امداداللہ بوسال داوخت آپارے کہ تنخواہ تیٹی ودکی بنداوی تنخواہ غا مریک، ہراوتواجہ ادارہ و کارپوریشن آک حکومتی پے اسکیل نا اطلاق کرینو ، ودکی نا اطلاق اوفتیا مریک ولے ہرا وتواجہ ادارہ کارپوریشن آتا تینا پے اسکیل مریک او تینا وڑوڈول نا رداٹ اوڑآعمل کیرہ ۔ اوپارے کہ ای اوبی آئی اسہ وتواجہ ادارہ اسے، پنشن اٹی ودکی نا فیصلہ اوتینٹ کیک۔ اوپارے کہ نان فائلرآتیکن کیپٹل گین خراج اٹی ودکی کننگانے۔