اسلام آباد۔ 12 جون (اے پی پی) حکومتی خڑچ آتے کم کننگ نا بابت جوڑ کمیٹی بنائی رپورٹ ءِ وزیراعظم محمد شہباز شریف ءِ پیش کرینے ہراٹی سفارش کننگانے کہ اسہ سال آن خورک غٹ آسامی تے چٹفسا قومی پیسہ ءِ بچفنگے، پوسکن بھرتی مروک آ سرکاری ملازم آتا کنٹریبیوٹری پینشن نا نظام اس اتنگے، دا بنائی سلاہ تا بابت وزیراعظم بڑزکو واکداری کمیٹی اس جوڑ کرے ہراکہ 10 ہفتہ نا تہہ ٹی جامع رپورٹ اس پیش کیک۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی حکومتی خڑچ و حکومتی پنجر نا کچ ءِ کم کننگ نا بابت اہم ءُ دیوان اس اڈہلک۔ حکومتی خڑچ آتے کم کننگ نابابت جوڑ کروک آ کمیٹی وزیراعظم ءِ بنائی رپورٹ پیش کرے۔ڈپٹی چیئرمین پلاننگ کمیشن نا کماشی ٹی جوڑ کمیٹی ٹی کابینہ، خزانہ ، اسٹیبلشمنٹ ، پاور ڈویژن نا سیکرٹری تیان بیدس ڈاکٹر قیصر بنگالی، ڈاکٹر فرخ سلیم و محمدنوید افتخار ئسک اوار ئسر۔ بنائی رپورٹ اٹی گونڈ مدتی و نیام مدتی سلاہ و سوج پیش کننگا۔ کمیٹی گڑاس سرکاری ادارہ غاتے بند کننگ، چندی ادارہ غاتے ضم کننگ و گڑاس ادارہ غاتے صوبہ غاتا دوٹی تِننگ نا سفارش کرے۔ کمیٹی داہم سفارش کرے کہ ہموغٹ آسامی ہرااسہ سال آن زیات انا وخت آن خورک ءُ چٹفسا قومی پیسہ غاتے بچفنگے۔ پوسکن بھرتی مروک آ سرکاری ملازم آتا کنٹریبیوٹری پینشن نظام اس اتنگے۔ سرکاری ادارہ غاتیٹی سروس آتا فراوانی کن نجی بشخ انا خذمت ہلنگے۔ رپورٹ اٹ پاننگانے کہ حکومتی خڑچ آتے کم کننگ کن سرکاری کارندہ غاتا بے گرج سفرآ پابندی خلنگے و ٹیلی کانفرنسنگ ءِ مون آ دننگے، ہموسرکاری آفیسر آک ہرا مونوٹائیزنگ نا آسراتی ءِ ہلنگ ءُ اوفتیان سرکاری گاڈی تے دمدستی پدی ہلنگے، دا بنائی آ سلاہ تا بابت وزیراعظم بڑزکو واکداری کمیٹی اس جوڑ کرے ہراکہ دہ ہفتہ نا تہہ ٹی جوان ءُ رپورٹ اس پیش کیک۔ داوخت آ وزیراعظم پارے کہ کمیٹی جہانی کہول انا گچین آزموندہ غاتیان فائدہ ہلسا پبی سلاہ ایتے، اومیتءِ کہ بڑزکو واکداری کمیٹی نا سلاہ و سوج آتے مون آ تخسا قوم انا ارب آ روپئی نا بچت مننگ کیک۔ دیوان اٹی بنجائی وزیر ڈٹ بندی احسن اقبال، بنجائی وزیر اقتصادی امور احد خان چیمہ ، بنجائی وزیر خزانہ ومحصولات محمد اورنگزیب ، وزیر مملکت خزانہ علی پرویز ملک، وزیراعظم نا کوآرڈی نیٹر رانا احسن افضل و تعلقدار بڑزکو سرکاری آفیسر آک ساڑی ئسر۔
