وزیراعظم شہباز شریف نا پبلک پرائیویٹ پارٹنر شپ تون اسلام آباد اٹی جہانی آب انا ہیلتھ ٹاور اس جوڑ کننگ نا پڑو

اسلام آباد۔ 12 جون (اے پی پی) وزیراعظم محمد شہباز شریف پبلک پرائیویٹ پارٹنر شپ تون اسلام آباد اٹی جہانی آب انا قائد اعظم ہیلتھ ٹاور اس جوڑ کننگ نا پڑو ءِ کرسا قومی وزارت جان جوڑی نا ماتحت لیبارٹری تا آب و کارکڑد، ڈرگ ریگولیٹری اتھارٹی آف پاکستان و اسلام آباد نا ہسپتال آتیکن پوسکن آ طبی ازباب و ایمبولینس آتا ہلنگ نا تھرڈ پارٹی آڈٹ کرفنگ نا پارت کرے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی وزارت  قومی جان جوڑی نا امور نا بابت اہم جاچ دیوان (اینو) چارشنبے نادے آوزیراعظم ہاؤس اسلام آباد اٹی اڈ ہلک۔ دیوان اٹی بشخ ہلوک آتون گپ وتران کرسا وزیراعظم پارے کہ جان جوڑی نا بشخ اسہ بھاز اہم و حساس بشخ اس ہرانا ذمہ انسانی جون تے بچفنگ نا اہم فرض ءِ۔ وزیراعظم اسلام آباد اٹی جہانی آب انا قائد اعظم ہیلتھ ٹاور اس جوڑ کننگ نا پڑو کرسا ہیلتھ ٹاور نا پبلک پرائیویٹ پارٹنر شپ نا رداٹ جوڑ کننگ نا بابت دمدستی وڑاٹ لائحہ عمل اس تیار کننگ نا پارت کرے۔ اوپارت کرے کہ ہیلتھ ٹاور اٹی گچین آب انا ہسپتال آتیان بیدس میڈیکل یونیورسٹی، نرسنگ یونیورسٹی، پوسکن آ ٹیکنالوجی آن شپ لیبارٹری و مرض آتا تشخیص نا ہند جوڑ کننگے۔ وزیراعظم ملک اٹی پولیو نا پوسکن آ کیس آتا مون آ بننگ آ گڑتی نا درشانی ءِ کرسا پارے کہ غٹ ملکی وسیلہ غاتے کاریم اٹ اتسا و شریدارآتا کمک اٹ ملک آن پولیو نا پورو چٹفنگ ءِ پک کینہ۔ وزیراعظم قومی وزارت جان جوڑی نا زیر تحت لیبارٹری تا آب و کارکڑد نا تھرڈ پارٹی آڈٹ کرفنگ نا پارت کرے۔ اووزارت قومی جان جوڑی و اوڑتون گنڈوک ادارہ غاتیٹی گچین کچ انا ہیلتھ پروفیشنل آتا تعیناتی نا پارت ہم کرے۔ وزیراعظم ڈرگ ریگولیٹری اتھارٹی آف پاکستان نا تھرڈ پارٹی آڈٹ کرفنگ و ڈرگ پرائیسنگ ءِ ڈریپ آن جتا کننگ نا بابت لائحہ عمل اس ترتیب تننگ نا پارت کرے۔ وزیراعظم اسلام آباد نا غٹ سرکاری ہسپتال آتیٹی ہیومن ریسورس آڈٹ کرفنگ نا پارت ہم کرے۔ اومچ آملک انا نرسنگ اسکول و کالج آتا ہم آڈٹ ءِ کرفنگ نا پارت کرے۔ وزیراعظم پارے کہ بنجائی دارالحکومت نا جان جوڑی نا بابت امور نا تینٹ چاروکی ءِ کیوہ۔ وزیراعظم اسلام آباد نا ہسپتال آتا فضلہ پروسیس کروک آ پلانٹ آتا کچ اٹی ودکی کننگ و  ہمو پلانٹ آتے آؤٹ سورس کننگ نا پارت کرے۔ دیوان  ءِ شاہ سلمان ہسپتال نا تفنگ آ پیش رفت نا بابت حوال تننگا۔ دیوان اٹی بنجائی وزیر ڈٹ بندی احسن اقبال ، بنجائی وزیر اقتصادی امور احد خان چیمہ، وزیراعظم نا کوآرڈی نیٹر جان جوڑی ملک مختار احمد، وزیراعظم نا کوآرڈی نیٹر رانا احسان افضل و تعلقدار بڑزکو سرکاری آفیسر آک بشخ ہلکر۔