بیجنگ۔ 11 جون (اے پی پی) چینی وزارت خارجہ نا ترجمان پارینے کہ وزیراعظم پاکستان محمد شہباز شریف نا دورہ ءِ چین اٹی ہڑتوم آملک آتا بڑزکو انگا سرکڑدہ غاک تین پہ تینی تعلقداری و اسیجائی است خواہی نا امور آ سرجمی اٹ گپ وتران کریر و پاکستانی الس نا راجی آسودہی ءِ گچین کننگ اٹ سی پیک نا مثبت کڑد انا ستاءِ کریر۔ سے شنبے نادے آ جاری بیان نا رداٹ چینی ترجمان پارے کہ ہڑتوم آ ملک آتا راہشونک پاک چین تعلقداری نا شونداری کن اسٹریٹجک راہشونی فراوان کریر۔ چین نا صدر شی جن پنگ داہیت آ زور شاغا کہ چین و پاکستان نانیام اٹ اسٹریٹجک کمکاری آتالان شریداری گہری مسنے، دا شریداری ٹی رائے عامہ نا سوگو بنداو، سوگو داخلی محرک قوت و گیشتر شونداری نا گمان ساڑی ءِ۔ چین اسہ ایلو نا پبی مخ تفی ءِ کننگ، کمکاری نا تعلقداری تے سوگو کننگ، اسٹریٹجک کوآرڈی نیشن ءِ گہرا کننگ و پوسکن آدوراٹی چین پاکستان ہم نصیب راج انا جوڑ کننگ ءِ ترند کننگ کن تیار ءِ۔ وزیراعظم شہباز شریف پارے کہ چین و پاکستان نا نیام اٹ آہنی سنگتی ءِ اسہ طاقت اس ہم سرفنگ کپک و پاکستان چین نا غٹ آن قابل اعتماد سنگت و شریدار مریک۔ فریق آک امنائی وڑاٹ تینا تینا بنداوی مفادات و اہم گڑتی تا بابت امور آ اسہ ایلو نا مخ تفی ءِ برجاتخنگ نا عزم انا درشانی ءِ کریر۔
