اسلام آباد۔ 11 جون (اے پی پی) اسپیکر قومی اسمبلی  سردار ایاز صادق پارینے کہ چائلڈ لیبر ءِ ہچ ءُ حالیت اسے ٹی منپنہ، چناک دا ملک انا آخبت آک ءُ و کس اسے ہم اوفتا لائخی، وقار و حق آن محروم کننگ نا موکل تفننگک، پاکستان نا پارلیمنٹ چناتا مزوری نا چٹفنگ کن سنبرینگوک ءِ۔ اوداہم پارے کہ چناتا مزوری نا چٹفنگ اوفتا روشناآخبت ءِ پک کننگ کن المی ءِ۔ اوداخیال آتا درشانی ءِ چائلڈ لیبر نا چٹفنگ نا جہانی دے انا وخت آ کرے، ہراہرسال 12 جون آ اڈتننگک۔ اسپیکر تینا کلہو اٹی داہیت انا پیدواری ءِ کرے کہ چائلڈ لیبر اسہ سنگین ءُ ویل اسے ہرا جہانی کہول آ لکھ آ چناتا جونی و ذہنی نشوونما ءِ نسخان تننگ ءِ۔ اوتعلیم، راجی رکھ انا پروگرام و چناتیکن رکھی گام گیج اٹی زرکاری نا گرج آزور شاغا۔ اسپیکر قومی اسمبلی چناتا مزوری نا توننگ و چناتا حق انا مون آ دننگ کن سخت خواری کروک آ غٹ اسٹیک ہولڈر آتا کوشست آتا ستاءِ کرے۔ اوغٹ اسٹیک ہولڈر آتیا زور شاغا کہ او تینا کوشست آتے برجاتخر و چناتا مشقت نا چٹفنگ کن امنائی سلاہ اٹ کاریم کیر۔ داوخت آ ڈپٹی اسپیکر قومی اسمبلی سید میر غلام مصطفیٰ شاہ پارینے کہ چائلڈ لیبر اسہ سنگین ءُ راجی ویل اسے ہرانا دمدستی مون ءِ توننگ نا گرج ءِ۔ اوداہیت آ زور شاغا کہ چناتے جبری مزوری آ بیوس کننگ نا جاگہ غا آب اٹ تعلیم و رکھ چاگڑد اسکان رسینگ بایدے تننگے۔ اوداہم زور شاغا کہ حکومت و سول سوسائٹی ءِ چناتا مزوری ءِ چٹفنگ و چناتے بنداوی حق انا فراوانی ءِ پک کننگ کن سخت گام گیج کننگ نا گرج ءِ۔