عمان۔ 11 جون (اے پی پی) نائب وزیراعظم و وزیرخارجہ محمد اسحاق ڈار اردن اٹی اڈ ہلوک آ ’’غزہ کن دمدستی انسانی ردعمل‘‘ نا سرحال آ بڑزکو کہولی کانفرنس نا وخت آ اقوام متحدہ نا سیکرٹری جنرل انتونیوگوتریش تون اوڑدہی کرے۔ سے شنبے نادے آ دفترخارجہ نا ترجمان نا کنڈآن جاری بیان نا رداٹ نائب وزیراعظم اقوام متحدہ نا سیکرٹری جنرل نا اردن و مصر اتون اسیجائی وڑاٹ کانفرنس نا اڈتننگ نا گام ءِ ہندن وخت اسے ٹی ستاءِ کرے ہراتم فلسطین نا الس ءِ جہانی مخ تفی و دمدستی انسانی  امداد نا سخت گرج ءِ۔ اوجہانی کہول آ غزہ نا حالیت آتیا گڑتی نا درشانی ءِ کننگ اٹ سیکرٹری جنرل نا سرکڑدہ و فعال کڑد انا ہم ستاءِ کرے۔ نائب وزیراعظم فلسطینی تا برخلاف اسرائیل نا کنڈآن طاقت نا اندھادھند و وحشیانہ کاریم اٹ ایس پاکستان نا شدید و پیدوار مذمت نا درشانی ءِ کرسا اسرائیل نا کنڈآن کروک آ جنگی ڈوہ و انسانیت نا برخلاف ڈوہ انا احتساب ءِ کننگ ، دمدستی و غیرمشروط جنگ بندی، غزہ نا محصور مخلوق ءِ بلاروک ٹوک انسانی امداد سرکننگ و بےاُرا فلسطینی ا واپسی ءِ پک کننگ آ زورشاغا۔ نائب وزیراعظم و وزیرخارجہ اقوام متحدہ نا سیکرٹری جنرل آ ہم زور شاغا کہ او اقوام متحدہ نا سلامتی کونسل نا تعلقدار قراردادآتا رداٹ جموں وکشمیر نامتکن آ تنازعہ نا انصاف اٹ ایسری کن اثرورسوخ ءِ کاریم اٹ اتے۔