راولپنڈی۔ 22 مئی (اے پی پی) اینٹی نارکوٹکس فورس منشیات اسمگلنگ نا برخلاف 9 کارروائی تیٹی 98 کلوگرام منشیات دوئی کرسا 6 دوبہ دار آتے دزگیرکرے۔ اے این ایف ترجمان نا رداٹ دا کارروائی تے تدوک آ بیست ءُ چار گھنٹہ ٹی کننگا۔ کراچی بالی پٹ آ بحرین آ ہنوک آ مسافر آن 2.2کلوگرام آئس و 420 گرام ہیرون دوئی کننگا۔ اسلام آباد بالی پٹ سعودی عرب آ ہنوک آ مسافر آن 720 دانہ نشئی ءُ گولی دوئی کننگا۔ راولپنڈی ٹی کوریئر آفس اٹی تھائی لینڈر آن گدریفوک آ پارسل آن 546 گرام ویڈ دوئی کننگا۔ بولان روڈ دشت انا خڑک آن 70 کلوگرام ہیرون دوئی کننگا۔ قلعہ عبداللہ آن 14 کلوگرام چرس دوئی کننگا۔ قاسم آباد حیدر آباد اٹی دوبہ دار آن 4 کلوگرام چرس دوئی کننگا۔ ایم ایم روڈ میانوالی ٹی اِرا دوبہ دار آن 3.6کلوگرام چرس دوئی کننگا۔ خیبرآن 2 کلوگرام نشئی ءُ گولی دوئی کننگا۔ کارروائی ٹی روات روڈ راولپنڈی ٹی دوبہ دار آن 1 کلوگرام چرس دوئی کننگا۔ ترجمان اے این ایف پارے کہ دزگیر دوبہ دارنا برخلاف انسدادِ منشیات ایکٹ نا رداٹ مقدمہ نوشتہ کرسا جاست وپاست نا بناءِ کننگانے۔
