کامسیٹس یونیورسٹی نا آخبتی ریکٹر نا تعیناتی نا عمل زوت پورو مریک، اعظم نذیرتارڑ

اسلام آباد۔ 22 مئی (اے پی پی) بنجائی وزیر کانود و انصاف و پارلیمانی امور اعظم نذیر تارڑ پارینے کہ کامسیٹس یونیورسٹی نا آخبتی ریکٹر نا تعیناتی نا عمل  زوت پورو مریک ۔ چارشنبے نادے آ سینیٹ نا دیوان اٹی سینیٹر ڈاکٹر زرقہ سہروردی تیمور نا چکاری نوٹس  ناو رندی ٹی بنجائی وزیر کانود، انصاف، و پارلیمانی امور اعظم نذیر تارڑ پارے کہ کامسیٹس یونیورسٹی نا بھاز جوان ءُ رینکنگ اسے، یونیورسٹی نا ریکٹر ڈاکٹر ساجد قمر کینیڈاغا ہنا و ہموکان او تینا استیفہ ءِ گدریفے ہرادے ہمووخت انا صدرمملکت ڈاکٹر عارف علوی منظور کرے۔ اوکان پد اسہ سرچ کمیٹی اس جوڑ کننگا، ریکٹر کن 80 بندغ آتے انٹرویو کن شارٹ لسٹ کرے، اوفتیان داسہ مسہ بندغ آتا اسہ پینل اس جوڑ کننگانے ہندافتیان صدر مملکت اسٹ اسے گچین کیک۔ اوپارے کہ ایکٹ اٹ بدلی نا اختیار بیرہ پارلیمان تون ءِ اسہ بندغ اس ہم ایکٹ اٹ لکھوک لوزاس ہم بدل کننگ کپک، رولز اٹی بدلی حکومت نا موکل آن پد ہی یونیورسٹی نا سینٹ کننگ کیک ولے قائمقام ریکٹر رولز اٹی نئے تو بدلی اس کرینے و نئے او کننگ کیک۔ تقرری تا بابت رولز انا ہچ ءُ خلاف ورزی اس کننگتنے۔ آخبتی ریکٹر نا تقرری زوت عمل اٹ بریک داڑکن پینل شارٹ لسٹ کرسا صدر ءِ گدریفنگک ہرانا او منظوری ءِ ایتک۔