تدوک آ سال ریلوائی نا کٹیاٹی ودکی مس، نسخان اٹی ہم کمتی بسنے، اعظم نذیر تارڑ

اسلام آباد۔ 22 مئی (اے پی پی) بنجائی وزیر کانود، انصاف و پارلیمانی امور اعظم نذیر تارڑ پارینے کہ ریلوائی ٹی کرپشن آ ملازم آتا برخلاف کارروائی کننگک، تدوک آ سال ریلوائی نا کٹیاٹی تدوک آ سال آتا مقابلہ ٹی 12 آن 15 ارب روپئی نا ودکی مسنے، کٹیا نا ودنگ آن نسخان اٹی ہم کمتی بسنے۔ چارشنبے نادے آ سینیٹ اٹی وقفہ سوج آتیٹی سینیٹر شہادت اعوان، سینیٹر محسن عزیز، سینیٹر ڈاکٹر ہمایوں مہمند و ایلو باسک آتا سوج آتا ورندی ٹی بنجائی وزیر کانود ، انصاف وپارلیمانی امور اعظم نذیر تارڑ پارے کہ پاکستان ریلوائی عشرہ غاتیان ویل آتا گواچی مسنے، ریلوائی نا حاضر سروس و ریٹائرڈ ملازم آتا کچ ہنداخہ زیات ءِ کہ اوفتا تنخوا و پنشن آ ریلوائی نا بجٹ نا 68 درسد بجٹ خڑچ مریک و ایلو زر آن پیٹرول، ڈیزل ، انجن ، بوگی تا ہلنگ و ایلوگرج آتے پورو کننگک۔ اوپارے کہ محکمہ ریلوائی اسہ ایکٹ اسے نا رداٹ جوڑ مسنے، ریلوائی ٹی کرپشن آ کارروائی کننگک، کراچی ٹی 14 ملازم آتے کرپشن آ ملازمت آن فارغ کننگانے، سکھر اٹی ہم ہندا وڑ کارروائی کننگانے و 12 لکھ روپئی نا ریکوری کننگانے، ہندا وڑ ملتان، لاہور، راولپنڈی و پشاور اٹی ہم کرپشن آ ملازم آتا برخلاف سخت ایکشن ہلنگانے۔ اوپارے کہ تدوک آ سال ریلوائی نا کٹیاٹی داکان مست چندی سال انا مقابلہ ٹی 12 آن 15 ارب روپئی ناکٹیاٹی ودکی مسنے۔ اوپارے کہ ہراتم اسکان پنشن نا ویل ایسر مفک، ریلوائی نا ویل سلک۔ اوپارے کہ تدوک آ مالی سال اٹی ریلوائی کن 111ارب روپئی نا بجٹ جتا کننگا ہرافتیان تنخواہ تیا 35 ارب روپئی آن زیات و پنشن آ 39 ارب روپئی خڑچ مریک۔