اسلام آباد آئی ٹی پارک نا تفنگ نا کاریم ءِ زوت پورو کننگے، وزیراعظم شہباز شریف نا آئی ٹی پارکس انا بارواٹی اہم دیوان اٹی پارت

اسلام آباد۔ 22 مئی (اے پی پی) وزیراعظم محمد شہباز شریف پارے کہ ملک اٹی آئی ٹی نا مون آ دننگ، آئی ٹی برآمد آتے ودفنگ و سٹارٹ اپس ءِ آسراتی فراوان کننگ نا بابت آئی ٹی پارکس نا جوڑ کننگ ستاکڑزک، اسلام آباد آئی ٹی پارک نا تفنگ ناکاریم ءِ زوت آن زوت پورو کننگے وخت اس کہ وزیراعظم ءِ پاننگاکہ سویلی کوریانا کمک اٹ اسلام آباد آئی ٹی پارک نا ڈٹ بروک آ سال پورو کننگک، 2025اٹی مچ آملک اٹی 100 پوسکن ای۔ روزگار ہند و 10 پوسکن سافٹ ویئر ٹیکنالوجی پارک جوڑ کننگک۔ وزیراعظم آفس نا میڈیا ونگ آن جاری بیان نا رداٹ وزیراعظم نا کماشی ٹی انفارمیشن ٹیکنالوجی پارکس نا بابت اہم دیوان چارشنبے آ وزیراعظم ہاؤس اٹی مس۔ دیوان اٹی بشخ ہلوک آتون گپ وتران کرسا وزیراعظم پارے کہ آئی ٹی نا مون آدننگ، آئی ٹی برآمد آتے ودفنگ و سٹارٹ اپس ءِ آسراتی فراوان کننگ نا بابت آئی ٹی پارکس نا جوڑ کننگ ستاکڑزک۔ اوپارت کرے کہ اسلام آباد آئی ٹی پارک نا تفنگ نا کاریم ءِ زوت آن زوت پورو کننگے۔ وزیراعظم سافٹ ویئر ٹیکنالوجی پارکس نا کارکڑد نا بابت تھرڈ پارٹی ایویلیوایشن کرفنگ نا پارت ہم کرے۔ دیوان ءِ وزارت انفارمیشن ٹیکنالوجی و ٹیلی کام نا کنڈآن آئی ٹی پارکس نا بابت حوال تننگا۔ دیوان ءِ پاننگاکہ سویلی کوریانا کمک اٹ اسلام آباد آئی ٹی پارک نا ڈٹ ءِ بروک آ سال پورو کننگک۔ اسلام آباد آئی ٹی پارک اٹ سٹارٹ اپس، انکیوبیشن سینٹر، بینکس، ریسٹورنٹ و پین آسراتی فراوان کننگک۔ دیوان ءِ معلومدار کننگا کہ کراچی ٹی سویلی کوریا نا کمک اٹ جناح انٹرنیشنل بالی پٹ نا خڑک انفارمیشن ٹیکنالوجی پارک نا ڈٹ 2027اسکان پورو مریک۔ دیوان ءِ مستی معلومدار کننگاکہ ملک 29 شار تیٹی 43 سافٹ ویئر ٹیکنالوجی  پارکس جوڑ کننگا، 2025اٹی مچ آملک اٹی 100 پوسکن ای۔روزگار ہند و 10 پوسکن سافٹ ویئر ٹیکنالوجی پارکس جوڑ کننگک۔ دیوان اٹی بنجائی وزیر اقتصادی امور احدخان چیمہ ، بنجائی وزیر خزانہ و محصولات محمد اورنگزیب، وزیر مملکت انفارمیشن ٹیکنالوجی و ٹیلی کام شزا فاطمہ ، ڈپٹی چیئرمین پلاننگ کمیشن جہانزیب خان، وزیراعظم نا کوآرڈی نیٹر رانا احسان افضل و تعلقدار بڑزکو سرکاری آفیسر آک بشخ ہلکر۔