اسلام آباد۔ 20 مئی (اے پی پی) پاکستان اسلامی جمہوریہ ایران نا صدر ڈاکٹر سید ابراہیم رئیسی و وزیرخارجہ حسین امیر عبداللہیان نا ہیلی کاپٹر شکست اٹی شہیدی نا است ہسون خبرآ اسلامی جمہوریہ پاکستان نا حکومت و الس نا کنڈآن ہڑزخواہی نا درشانی ءِ کرینے۔ دفترخارجہ نا کنڈآن دوشنبے نادے آ جاری ہڑزخواہی بیان اٹی پاننگانے کہ نن ڈکھیائی و غم انا داساہت اٹی اسلامی جمہوریہ ایران نا الس تون ہڑزخواہی نا درشانی ءِ کینہ۔ دفترخارجہ تینا بیان اٹی مستی پارے کہ ننادعاک شہید آتا خاہوت و اسلامی جمہوریہ ایران نا الس تون ءُ و ماتن نا دا ساہت اٹی نن تینا ایرانی ایلم تتون یکجہتی نا درشانی ءِ کینہ۔ بیان نا رداٹ صدر ڈاکٹر سید ابراہیم رئیسی و وزیرخارجہ حسین امیر عبداللہیان قابل شرف راہشون ئسر۔ اوفتا پاکستان ایران تعلقداری و علاقائی کمکاری ءِ سوگوی تننگ کن خذمت آتے مدام یات تخنگک۔ اوننا ہڑتوم آکنڈآتا تعلقداری تے سوگو کننگ کن دااپریل اٹی پاکستان نا دورہ ءِ کریر۔ دفترخارجہ جاری بیان اٹی پارے کہ اسلامی جمہوریہ پاکستان ایران تون سنگتی و کمکاری ءِ مون آ دننگ نا تینا عزم انا درشانی ءِ کیک۔
