مکہ مکرمہ۔ 20 مئی (اے پی پی) بنجائی وزیر مذہبی امور چوہدری سالک حسین پارینے کہ پاکستان حج مشن حاجی تے آسراتی تا فراوانی نا بابت بے مٹ کاریم کننگ اٹی ءِ۔ داہیت ءِ او مکہ مکرمہ ٹی جوڑ پاکستان حج مشن اٹی دیوان نا کماشی ءِ کرساپارے۔ بنجائی وزیر پارت کرے کہ حاجی تا آسراتی کن غٹ وسیلہ غاتے کاریم اٹ اتنگے۔ ڈی جی حج بنجائی وزیر ءِ برجاحج آپریشن 2024 نا بابت حوال تس۔ ڈائریکٹر حج میڈیکل مشن بریگیڈیئر جمیل لاکھیر، ڈائریکٹر کمکار اصغر یوسفزئی، ڈائریکٹر حج مکہ فہیم آفریدی و ایلو آفیسر آک دیوان اٹی ساڑی ئسر۔ داکان مست پاکستان حج مشن مکہ مکرمہ غا سرمننگ آ ڈی جی حج عبدالوہاب سومرو بنجائی وزیر ءِ بخیرکرے۔ بنجائی وزیر مذہبی امور چوہدری سالک حسین مکہ مکرمہ ٹی منیٰ ، عرفات و مزدلفہ نا دورہ ءِ کرے و پاکستانی حاجی تے تروک آ سراتی تاجاچ ءِ ہلک۔ چوہدری سالک پارے کہ پاکستانی حاجی تے حج اٹی گچین آسراتی تا فراوانی اولیت ءِ۔ وزیر مذہبی امور پارے کہ حاجی تا خذمت عبادت ءِ۔ حاجی تے مست آن زیات گچین آسراتی تننگک۔ بنجائی وزیر کمپنی ءِ پارت کرے کہ منیٰ نا تمبوتیٹی باسنی آن بچنگ کن بست وبند کننگے۔ داوخت آ پاکستان حج مشن و سعودی کمامدارآک بنجائی وزیر ءِ پاکستانی حاجی تے تروک آ آسراتی تا بابت حوال تس۔ کمامدارآک پاریر کہ برجاسال غٹ سرکاری حاجی تے مشاعرٹرین نا آسراتی تننگک۔
