صدر آصف علی زرداری نا ایرانی صدر سید ابراہیم رئیسی نا ہیلی کاپٹر شکست اٹ کزیت آ ہڑزخواہی نا درشان

اسلام آباد۔ 20 مئی (اے پی پی) صدر مملکت آصف علی زرداری ایرانی صدر سید ابراہیم رئیسی نا ہیلی کاپٹر شکست اٹی کزیت آ است ہسونی نا درشانی ءِ کرسا پارینے کہ صدر ابراہیم رئیسی امت مسلمہ نا سیوت نا بھلا مخ تف ئس، عالم اسلام اسہ عظیم ءُ راہشون اسے آن محروم مس۔ دوشنبے نادے آ ایوان صدر نا پریس ونگ آن جاری بیان نا رداٹ صدر مملکت تینا ہڑزخواہی کلہواٹی صدر مملکت آصف علی زرداری ایرانی صدر، وزیرخارجہ و شکست اٹی زوال کروک آایلو بندغ آتا پدسلوک آتون ہڑزخواہی نا درشانی  ءِ کرے۔ صدر مملکت مسلم امہ کن مسکوہی صدر ابراہیم رئیسی نا خذمت آتے خراج تحسین پیش کرساپارے کہ ایرانی صدر فلسطینی و کشمیری الس تون اوار جہانی کہول آ مسلمان تا دڑد ءِ است اٹ محسوس کریکہ، اینو پاکستان اسہ عظیم ءُ سنگت اسے گوہنگ آ غمزدہ ءِ۔ اوپارے کہ تدوک آ تُو ننے پاکستان اٹی اونا مہمانداری نا اعزاز دوئی مس، ننا گپ وتران اٹی، ای اودے ہڑتوم آ کنڈآتا تعلقداری تے سوگو کننگ کن سنبرینگوک خناٹ، آغارئیسی  مدام پاکستان و اونا الس ءِ خا ص ءُ ہند اس تسکہ، صدر رئیسی نا کزیت نئے بیرہ ایران بلکن مچ آ امت مسلمہ کن اسہ بھلو نسخان اسے۔ اوپارے کہ صدر رئیسی ءِ علاقائی و اسلامی ملک آتون تعلقداری تے ودفنگ نا کوشست آتیا ایران، پاکستان و عالم اسلام اٹی یات تخنگک، اللہ تعالیٰ اونا روح ءِسکون عطاکے، بے بدل نسخان نا دا ساہت اٹی اوناخاہوت و ایران نا الس ءِ صبر و استقامت عطاکے۔