وزیراعظم شہباز شریف نا ڈل اتون اوڑدہی ٹی گپ وتران

اسلام آباد۔ 17 مئی (اے پی پی) وزیراعظم محمد شہباز شریف پارینے کہ پاکستانی تا است تینا کشمیری ایڑھ ایلم تتون دھڑکک دا امہ مننگ کریکہ کہ آزاد کشمیر اٹی ننا ایڑھ ایلم مشکل اٹ مریر و نن آسرات تولن۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او پاکستان مسلم لیگ (ن) آزاد جموں وکشمیر نا صدر شاہ غلام قادر نا کماشی ٹی پارٹی ڈل اتون گپ وتران کرساکرے ہراجمعہ نادے آ داڑے اوڑتون اوڑدہی کرے۔ اوڑدہی ٹی بنجائی وزیر آک ہم ساڑی ئسر۔ ڈل آزاد کشمیر نا ساڑی حالیت آتا مون ءِ توننگ و ویل آتا ایسری آ وزیراعظم ءِ خراج تحسین پیش کرے۔ ڈل پاکستان نا زرگزران نا بحالی و ملک اٹی پیشن نا زرکاری اتنگ کن کروک آ گام گیج آتا ستاءِ کرے۔ وزیراعظم ڈل ءِ آزاد کشمیر نا شونداری و شونہالی ٹی تینا پبی کڑد ءِ ادا کننگ نا پارت کرے۔ وزیراعظم پارے کہ نم تینا پبی کوشست ءِ کبو کہ آزاد کشمیر نا الس ءِ زیات آن زیات ریلیف ملے۔ پاکستانی تا است تینا کشمیری ایڑھ و ایلم تتون دھڑکک۔ داامہ مننگ کریکہ کہ آزاد کشمیر اٹ ننا ایڑھ و ایلمک مشکل اٹ مریر و نن آسرات تولن۔ وزیراعظم پارے کہ پاکستان کشمیر کاز ءِ  مچ آ دنیا ٹی تالان کننگ ءِ۔ پاکستان مدام کشمیری تا اخلاقی، سیاسی و سفارتی مخ تفی ءِ برجاتخک۔ اوڑدہی ٹی پاکستان مسلم لیگ (ن) آزاد جموں وکشمیر نا امور آ ہم گپ وتران کننگا۔ وزیراعظم ڈل ءِ آزاد جموں وکشمیر اٹی پارٹی ءِ پین منظم کننگ نا پارت کرے۔ وزیراعظم پارے کہ الس تون تینا رابطہ غاتیٹی پین گچینی اتیر۔