وزیراعظم شہباز شریف تون چینی کمپنی ایم سی سی ٹونگسن ریسورسز نا ڈل انا اوڑدہی

اسلام آباد۔ 17مئی (اے پی پی) وزیراعظم محمد شہباز شریف پارینے کہ حکومت پیشن نا زرکاری ٹی ودکی کن اولیتی بنداوتیا گام گیج کننگ اٹی ءِ و چینی کمپنی ایم سی سی ٹونگسن ریسورسز پاکستان اٹ معدنیات و کانڑکنی نا بشخ اٹی تینا زرکاری ءِ ودفنگ اٹ بھاز است خواہی نا درشانی ءِ کرینے۔ وزیراعظم آفس نا میڈیا ونگ آن جاری بیان نا رداٹ جمعہ نادے آ وزیراعظم محمد شہباز شریف تون چیئرمین وانگ جائی چینگ نا کماشی ٹی چینی کمپنی ایم سی سی ٹونگسن ریسورسز نا ڈل داڑے اوڑدہی کرے۔ اوڑدہی ٹی بنجائی وزیر احدخان چیمہ، ڈاکٹر مصدق ملک، رانا تنویر حسین، جام کمال خان و تعلقدار بڑزکوکمامدارآک بشخ ہلکر۔ چینی کمپنی پاکستان اٹ معدنیات و کانڑ کنی نا بشخ اٹی تینا زرکاری ءِ ودفنگ اٹ بھاز است خواہی نا درشانی ءِ کرے ، ہرا وزیراعظم شہباز شریف نا کماشی آ پیشن نا زرکاری نا پت انا درشانی ءِ۔ کمپنی پاکستان اٹ منرل پارک جوڑ کننگ نا بابت وزیراعظم ءِ سرجمی اٹ حوال تس و مستی زرکاری نا ڈٹ آتیان معلومدار کرے۔ وزیراعظم چینی کمپنی نا خیرمقدم ءِ کرے و پارے کہ حکومت ملک اٹی پیشن نا زرکاری نا ودکی کن اولیتی بنداوتیا گام گیج کننگ اٹی ءِ ۔ وزیراعظم پارے کہ چین پاکستان نا متکن آ سنگت و شونداری ٹی اہم شریدار ءِ۔ چین پاکستان نا ہر خراب انگا وخت اٹ کمک ءِ کرے ہراڑآ کنتون اوار مچ آ قوم چینی سرکڑدہ و چینی الس نا منت وار ءِ۔ وزیراعظم چینی کمپنی ءِ پاکستان اٹ معدنیات نا بشخ اٹی کانڑکنی آن ہلیس برآمدی گڑاتا تیاری کن زرکاری کننگ نا سلہ خلک۔ وزیراعظم پارے کہ پاکستان نا برآمدآتیٹی ودکی کن معدنیات کشنگ، اوفتا پراسیسنگ و اوفتا مصنوعات آتے برآمد کننگ کن زرکاری ءِ پورو آسراتی تننگک۔ وزیراعظم تعلقدار بنجائی وزیر وآفیسر آتے چینی کمپنی تون سلابت نا پارت کرے۔ وزیراعظم سلابتی عمل اٹ وزیراعلیٰ بلوچستان و صوبہ نا تعلقدار ادارہ و اسٹیک ہولڈر آتے اوار کننگ نا ہم پارت کرے۔