علاقائی و جہانی ویل آتیا پاکستان نا موقف اقوام متحدہ نا چارٹرنا اصول و مسخت آتا رداٹءِ، سفیر منیراکرم

اقوام متحدہ۔ 17 مئی (اے پی پی) اقوام متحدہ ٹی پاکستان نا سفیر منیر اکرم پارینے کہ علاقائی و جہانی ویل آتیا پاکستان نا موقف اقوام متحدہ نا چارٹرنا اصول و مسخت آتا رداٹ ءِ، خامی و بے سہبی تیان پد ہم ، اقوام متحدہ داسہ ہم اسہ فائدہ ئی کثیر جہتی فورم اسے۔ اوداہیت ءِ نیشنل ڈیفنس یونیورسٹی (این ڈی یو) اسلام آباد نا اسہ ڈل اسے اقوام متحدہ نا ایجنڈاغا جہانی و علاقائی ویل و جہانی ادارہ غاتیٹی پاکستان نا کڑد انا بارواٹی حوال ترساپارے۔ سفیر منیراکرم ڈل ءِ پارے کہ پاکستان اقوام متحدہ نا غٹ ادارہ، خاص وڑاٹ ملک انا اہم فائدہ غاتا باندات  ءِ تالان کننگ اٹ فعال کڑد ادا کننگ ءِ۔ اوڈل ءِ پارے کہ پاکستان 2025-26نا مد اٹی اقوام متحدہ نا طاقت نا مرکز سلامتی کونسل اٹ بے آخبتی نشست نا اومیتدار ءِ۔ اوپارے کہ اگہ گچین مس تو دا پاکستان ءِ جہانی و علاقائی امن و سوگوی ءِ مون آ دننگ نا کوشست آتیٹی تینا بشخ ءِ شاغنگ نا موقع فراوان کیک۔ سفیر اکرم پارے کہ پاکستانی مشن بھارت نا غیرکانودی کوزہ ٹی جموں وکشمیر نا جھیڑہ غا سلامتی کونسل نا قرارداد آتیا عملدرآمد ءِ پک کننگ و بھارتی مقبوضہ علاقہ ٹی انسانی حق انا خلاف ورزی تیا جہانی برادری نا چکار ءِ کرفنگ کن ہرممکن کوشست کننگ اٹی ءِ۔