وزیرداخلہ محسن نقوی نا نادرا ہیڈکوارٹرزنا دورہ، شناختی کارڈ آتا جاری و پوسکنی کن یونین کونسل نا کہول آ بائیومیٹرک مشن خلنگ ناپارت

اسلام آباد۔ 17 مئی (اے پی پی) بنجائی وزیر داخلہ محسن نقوی شناختی کارڈ انا جاری و پوسکنی کن مچ آپاکستان اٹ یونین کونسل نا کہول آ بائیومیٹرک مشین خلنگ نا پارت کرساپارینے کہ شناختی کارڈ آتا نظام ءِ فول پروف، گچین و ترند رفتار کننگے۔ او جمعہ نادے آ نادرا ہیڈکوارٹرنا دورہ ءِ کننگ نا وخت آ گپ وتران کریکہ۔ بنجائی وزیر داخلہ نادرا ہیڈکوارٹراٹی اسہ اہم ءُ دیوان اسے نا کماشی ءِ کرے۔ ہراٹی نادراءِ الس کن پین فرینڈلی کننگ کن چندی سلاہ تا جاچ ءِ ہلنگا۔ الس ءِ آسراتی فراوان کننگ کن کیہی بھلو و اہم فیصلہ کننگا۔ بنجائی وزیر داخلہ پارت کرے کہ یونین کونسل نا کہول آ شناختی کارڈ جوڑ کرفنگ و وپوسکنی نا آسراتی فراوان کننگ نا پلان ءِ منہ دے اٹی گڈیکو دروشم اس تننگے۔ اوشناختی کارڈ انا نظام ءِ فول پروف، گچین و ترند رفتار کننگ کن پلان اس ہم بٹنگا۔ بنجائی وزیر داخلہ پارے کہ نادرا سینٹرنا دورہ ءِ کریٹ و حالیت آتا جاچ ءِ ہلکٹ ای تینٹ مشاہدہ کریٹ کہ الس ءِ بھاز مشکل و سختی مون تروک ءِ۔ اونادرا کمامدارآتے پارت کرساپارے کہ ہندن ءُ پلان اس جوڑ کننگے ہراڑآن نادرا سینٹرآتیا بروک آتیکن آسانی مرے و کاریم بلاتاخیرمرے۔ شاری تا رش ءِ مون آ تخسا بنجائی وزیر داخلہ محسن نقوی 6 بھلا شار تیٹی نادرا سینٹر آتیٹی ودکی نا 7 دے اٹی پلان اس ہم بٹنگا۔