پاکستان آپٹیکل فائبر جوڑ کروک آملک ءِ، فائیو جی سروس زوت لانچ مریک، وزیر مملکت شیزہ فاطمہ خواجہ نا ہواوے پاکستان نا کنڈآن دود آن تران

اسلام آباد۔ 17 مئی (اے پی پی) وزیر مملکت انفارمیشن ٹیکنالوجی اینڈ ٹیلی کام شیزہ فاطمہ خواجہ پارینے کہ نیشنل ڈیجیٹل فریم ورک انا رداٹ کانود سازی نا کنڈآ ہِننگ ءِ، وزیراعظم نا کماشی ٹی کمیشن آئی ٹی نا بشخ انا شونداری و مون آ دننگ کن  گام گیج کیک، پاکستان آپٹیکل فائبر جوڑ کروک آ ملک ءِ، فائیو جی سروس اتنگ نا تیاریک برجاءُ، بھاز زوت پاکستان اٹ فائیو جی سروس لانچ مریک، وزیرخزانہ نا کماشی ٹی آکشن کمیٹی داباندات آتے ہُننگ اٹی ءِ۔ او جمعہ نادے آ ہواوے پاکستان ہیڈکوارٹرزاٹی جہانی یوم ٹیلی کام نا رداٹ اڈ ہلوک دود آن تران کریکہ۔ ہواوے پاکستان نا کمامدارآک داوخت آ وزیر مملکت ءِ پاکستان اٹ ہواوے ٹیکنالوجی تا بارواٹی حوال تسر۔ وزیر مملکت ایگزبیشن سینٹر اٹی ہواوے ٹیکنالوجی نا ہم مشاہدہ ءِ کرے۔ وزیر مملکت شیزہ فاطمہ خواجہ پارے کہ وزیراعظم شہباز شریف نا وژن نا رداٹ حکومت اولیتی بنداوتیا غٹ اسٹیک ہولڈر آتون اواری اٹ آئی ٹی نا مون آ دننگ کن کاریم کننگ ءِ۔ حکومت نا وژن دادے کہ ملک انا کونہ کونہ ٹی انٹرنیٹ، سمارٹ فون، ڈیوائس و فائبر آپٹیکل نا آسراتی تے پک کے، آئی ٹی نا کمک اٹ تعلیم ، کسب، روزگارنا وارخواہی تے ودفسا بریبر شونداری ءِ پک کننگ مریک۔ اوپارے کہ مچ آدنیا ٹی آئی ٹی نا بشخ اٹی جدت بننگ ءِ، انٹرنیٹ و کنکٹیوٹی آن بیدس شونداری ممکن اف۔