مظفرآباد ۔ 16 مئی (اے پی پی) وزیراعظم محمد شہباز شریف پارینے کہ آزاد کشمیر اٹی برانزی تحریک اٹی شرپسند زموار آتا کنڈآن حالیت آتے خراب کننگ و جلاؤ گھیراؤ تا کوشست بے سہب مس، باندات آتے گچین وڑاٹ ایسر کننگا، آزاد کشمیر نا الس پاکستان تون والہانہ مہرومریبت کیک، پاکستان کشمیری الس کن مچ آ دنیاٹی توار بڑز کرسا کیک، بھارت نا غیرکانودی کوزہ ٹی جموں وکشمیر و فلسطین نا حالیت آتیا دنیا خاموش تماشائی جوڑ مسنے، ہمودے مراف ہراتم کشمیری و فلسطینی الس ءِ اوفتا حق ملک۔ داخیال آتا درشانی ءِ او پنچ شنبے نادے آ آزاد جموں وکشمیر نا کابینہ نا دیوان آن تران اٹی کرے۔ وزیراعظم پارے کہ اللہ تعالیٰ نافضل وکرم اٹ تدوک آ دے تیٹی مروک آ واقعہ گچین وڑاٹ ایسر مس۔ حالیت آتے کنٹرول کننگ اٹ کڑد ادا کننگ آ صدر مملکت و سیوتی تا منت وار اُٹ، تحریک چلیفوک آک تینا روا باندات آتیکن اسہ جمہوری وڑاٹ تینا برانز ءِ ریکارڈ کرفیر ولے دا تحریک اٹی گڑاس ہندن ءُ شرپسند زموار ئسر ہرافتا مسخت ئس کہ وڑانا وڑاسے اٹ آزاد جموں وکشمیر اٹی پرغ وبٹ ، انسانی جون تا زیان و جلاؤ گھیراؤ کننگے۔
