بیجنگ۔16 مئی (اے پی پی) نائب وزیراعظم و وزیرخارجہ سینیٹر محمد اسحاق ڈار پنچ شنبے نادے آ بیجنگ اٹی السی جمہوریہ چین نا وزیرخزانہ لان فوآن تون اوڑدہی کرے۔ دفترخارجہ نا رداٹ نائب وزیراعظم محمد اسحاق ڈار و چین نا وزیرخزانہ پاک چین مالیاتی و بینکنگ نا بشخ آتیٹی کمکاری نا ستا ءِ کرسا اودے ہڑتوم آ ملک آتا نیام اٹ ’’آل ویدر اسٹریٹجک کوآپریٹو پارٹنر شپ‘‘ نا درشانی گوندا۔ اوخاص وڑاٹ پاکستان و چین نا نیام اٹ ودوک آ بزنس ٹو بزنس رابطہ غاتا رداٹ مالی کمکاری ءِ پین ودفنگ آ گپ وتران کرے۔ چینی وزیرخزانہ پاکستان نا زرگزران نامثبت رفتارنا ذکر ءِ کرسا پاکستان نا اقتصادی ایجنڈانا ستاءِ کرے و مالی سوگوی ءِ سوگو کننگ نا کوشست آتیٹی چین نا پاکستان نا مخ تفی ءِ برجاتخنگ نا درشانی ءِ کرے۔ اوپاکستان و چین نا نیام اٹ مالیاتی و بینکنگ نا بشخ آتیٹی کمکاری ءِ پین کڑمب کننگ اٹ نائب وزیراعظم نا کمکاری نا ہم ستاءِ کرے۔ اوڑدہی ٹی نائب وزیراعظم و وزیرخارجہ سینیٹر محمد اسحاق ڈار براہ راست درملکی زرکاری ءِ اتنگ کن گورننس ، ریونیو و کاروبار کننگ اٹ آسانی آ حکومت پاکستان نا اصلاحاتی ایجنڈا نا ذکر ءِ کرے۔ اوچین آن زرکاری ءِ پاکستان نا اولیت نا وڑٹ ہم تالان کرے۔ اوپارے کہ دامسخت کن ہرا اولیتی بشخ آتا پیدواری ءِ کننگا اوفتے ٹی کشت وکشار، آئی ٹی، کانڑ ومعدنیات وقابل تجدید توانائی نا بشخ آک اوار ءُ۔
