خاران۔ 16 مئی (اے پی پی) بلوچستان یونیورسٹی سب کیمپس خاران اٹی اسہ دود اس اڈ ہلک ، ہرانا مہمان خاص پروفیشنل لائرز پینل نا راہشون ایڈووکیٹ سپریم کورٹ عطاء خان کاکڑ ئس، ہراڑتون اوار ایڈووکیٹ حبیب الرحمان قمبرانی، سفرخان راسکوئی، و ایچ او ڈی لاڈیپارٹمنٹ اکرام اللہ بلوچ ئسک ئسر۔ دود آن تران کرسا ایڈووکیٹ سپریم کورٹ عطاء خان کاکڑ، ایڈووکیٹ حبیب الرحمان قمبرانی، سفرخان راسکوئی و ایڈووکیٹ اکرام اللہ بلوچ ئسک پاریر کہ طالب علم آک ساڑی آ دور انا چیلنج آتون مون ترسا تینے مقابلہ کن تیار تخر ، خواری ولگن اٹ تینا تعلیم آ چکار تخر، انتئے کہ داوخت آ بیدس قابلیت آن میدان اسے ٹی سرسہبی دوئی کننگ بیرہ اسہ تغ اسے، دا خاران نا طالب علم آتا خوش بختی ءِ کہ داوخت آاوفتے اُرانا درگہ غا بڑزکو تعلیم دوئی کننگ نا آسراتی ساڑی ءِ، داسہ دا طالب علم آتیا منحصر ءِ کہ او خواری کیر و تینا علاقہ و قوم انا شونداری ٹی تینا کڑد ءِ ادا کیر۔ اوپارے کہ وکلاء سول سوسائٹی نا اہم ءُ کڑد اس مریک، ہراظلم و نا انصافی نا برخلاف کانود نا کمک اٹ مظلوم نا حق اکن جنگ ایتک، دود اٹی سانحہ 8 اگست نا یات گاری ویڈیو کلپ اس ہم چلیفنگا و شہید آتے خراج تحسین پیش کننگا۔ پروگرام نا ایسر اٹ پروفیشنل لائرز فورم نا راہشون ایڈووکیٹ سپریم کورٹ عطاء خان کاکڑ شہید باز محمد کاکڑ فاؤنڈیشن نا کنڈآن یونیورسٹی سب کیمپس خاران نا اِراطالب علم آتیٹی لیپ ٹاپ بشخا۔
