اسلام آباد۔ 15 مئی (اے پی پی) بنجائی وزیر ڈٹ بندی، شونداری و اصلاحات احسن اقبال پارینے کہ پاکستان ہروڑنا دولت آن مالامال ءِ، امن آن بیدس ملک اٹی شونداری مننگ کپک، سیاسی سوگوی آن بیدس اسہ پالیسی اس ہم سرسہب مفک، سی پیک کون آ ڈٹ ننکن ٹیکی اسے۔ چارشنبے نادے آ داخیال آتا درشانی ءِ او پاکستان ڈویلپمنٹ سمٹ اٹی خصوصی تران کرساکرے ۔ اوپارے کہ پاکستان اٹی وسیلہ غاتا کمتی اف، وسیلہ غاتے سہی وڑاٹ فائدہ ئی کننگ کن بست وبندآتا کمتی ءِ، ننے اسہ قومی اقتصادی چارٹراس جوڑ کروئی مریک، ملک اسے ٹی پالیسی نا چرجوئی برقرارسلے تو شونداری مریک۔ اوپارے کہ داکانفرنس اٹی اسہ اہم ءُ ڈٹ اسے کن ورک پلان اس جوڑ کننگ ءِ۔ پاکستان ہروڑنا دولت آن مالامال ءِ، نن انڈر ڈویلپ آخا انڈرمینج کنٹری اسے اُن۔ احسن اقبال پارے کہ نن دہ سال اٹی ملک ءِ شونداری نا کسر آ دننگ کینہ، امن آن بیدس ملک اٹی شونداری مننگ کپک، سیاسی سوگوی آن بیدس اسہ پالیسی اس ہم سرسہب مفک۔ اوپارے کہ جمہوری حکومت اسے کم از کم 10 سال پدریسہ ملے تو پالیسک سرسہب مریرہ، ننے اسہ قوم اس جوڑ مرسا کاریم کروئی مریک، ننے تینا اقتصادی شونداری نا سفر اٹ ننے ہمسایہ ملک آتے پدی ہلوئی ءِ ۔ احسن اقبال پارے کہ سی پیک کون آ ڈٹ ءِ قدرت ننے ٹیکی اسے ٹی تسنے، حکومت نا کٹیا 7 ہزار ارب روپئی و وام تا پدی تننگ 8 ہزار ارب روپئی ءِ، اسہ ہزار ارب روپئی وام ہلوئی تمک، ننے تینا وسیلہ غاتے متحرک کروئی ءِ۔
