بیجنگ۔ 15 مئی (اے پی پی) نائب وزیراعظم و وزیرخارجہ سینیٹر محمد اسحاق ڈار چارشنبے آ بیجنگ اٹی چین انا ایگزیکٹیو نائب وزیر اعظم ڈنگ زوکسیان تون اوڑدہی کرے۔ دفترخارجہ نا رداٹ اوڑدہی ٹی ہڑتوم آ پلوآتا بڑزکو کمامدارآک ہم ساڑی ئسر۔ نائب وزیراعظم و وزیرخارجہ داسال 26 مارچ آ شانگلہ جلہو آ چین نا ایگزیکٹیو نائب وزیراعظم تون ہڑزخواہی نا درشانی ءِ کرے و ڈوہدار تے اوفتے اوفتا کروک نا سزاتننگ نا باوری و خلنگوک آ چینی کارندہ غاتا خذمت آتا ستا ءِ کرے۔ ہڑتوم آ راہشونک سی پیک نا ارٹ میکو ریسہ ، واپار، اقتصادی کمکاری و زرکاری تون اوار ہڑتوم آ کنڈآتا تعلقداری نا چندی پلو آتیا سرجمی اٹ گپ وتران کریر۔ اوخنجراب بارڈر کراسنگ نا کمک اٹ رابطہ و ویزانا آسان نظام آ ہم گپ وتران و کمکاری نا غٹ بشخ آتیٹی پاک چین تعلقداری نا ودوک آ رفتار ءِ برقرارتخنگ و پاک چین سنگتی ءِ پین کڑمب کننگ آ امنا کریر۔ نائب وزیراعظم و وزیرخارجہ محمد اسحاق ڈار توانائی و انفراسٹرکچر اٹی سی پیک نا کنڈآن پیش رفت نا جاچ ءِ ہلک۔ او صنعت، کشت وکشار و معدنی شونداری نا بشخ آتیٹی ارٹ میکو ریسہ نا رداٹ مثبت منافع غا پت انا درشانی ءِ کرے۔ چین نا نائب وزیراعظم ڈنگ ذوکسیان زرگزران، واپار و زرکاری تون اوار کمکاری نا غٹ بشخ آتیٹی پاکستان کن چین نا پورو مخ تفی نا درشانی ءِ کرے و تین پہ تینی شونہالی و شونداری کن سی پیک ڈٹ آتیا ترندی اٹ عملدرآمد نا اہمیت نا درشانی ءِ کرے۔
