اسلام آباد۔ 15 مئی (اے پی پی) اسپیکر قومی اسمبلی سردار ایاز صادق بلوچستان نا ضلع ژوب اٹی دہشت گرد آتا برخلاف سیکورٹی فورس آتا سرسہب آپریشن آ خراج تحسین پیش کرسا دہشت گرد آتون بہادری اٹ مقابلہ کرسا شہید مروک آ میجر بابر خان ءِ خراج عقیدت پیش کرینے۔ چارشنبے نادے آ تینا اسہ کلہو اسے ٹی اوشہید میجر بابر نا خاہوت تون ہڑزخواہی و سیکورٹی فورس و میجر بابرخان نا خاہوت آتون یکجہتی نا درشانی ءِ کرے۔ اسپیکر پارے کہ قوم انا بہادر گلزادہ وطن و قوم انا خاطر تینا نہادی جون نا قربانی ءِ تسنے۔ ملک و قوم انا خاطر تینا جون تے ندر کروک آ تا دترزیان مفک۔ پاکستان نا الس بہادر ورناتا قربانی تے اسُل است آن دپک۔ ملک آن دہشت گردی نا چٹفنگ کن مچ آ قوم تینا سیکورٹی ادارہ غاتون سلوک ءِ۔ دہشت گردی نا برخلاف جنگ اٹی جون تا نذرانہ پیش کروک آ بہادر گلزادہ غاتے قوم سلام پیش کیک۔ قوم انا بہادر گلزادہ غاک ملک و قوم انا سلامتی نا خاطر ہراقربانی تے تسنو اوفتے روشنا لوز آتیٹی نوشتہ کننگک۔ دہشت گرد آک دشمن نا ناپاک ایجنڈا نا پوروی کن ملک اٹی امن ءِ لتاڑنگ اٹ لگوک ءُ۔ پاکستان نا فوج و الس دشمن نا ناپاک عزم ءِ مش تا کننگ کن سنبرینگوک ءُ۔ اوپارے کہ دشمن تینا لغوری ناکارروائی تا کمک اٹ دہشت گردی نا برخلاف قوم و سیکورٹی فورس آتا بدل مفروک عزم ءِ متزلزل کننگ کپک۔ اسپیکر اللہ تعالیٰ آن شہید انا درجہ غاتا بڑزی و خاہوت ءِ صبر وجمیل عطاکننگ کن دعاہم کرے۔
