اسلام آباد۔ 14 مئی (اے پی پی) بنجائی وزیر امور کشمیر و گلگت بلتستان انجینئر امیر مقام پارینے کہ آزاد کشمیر اٹی ہڑدڑ وبے چیٹی تالان کروک آتا تغ مش تا مسنے، حکومت پاکستان، کشمیر و گلگت بلتستان نا قربانی تے ہرسا اوفتا خواست آتے ہرگڑاغان ایڑترمرسا پورو کننگ کن سنبرینگوک ءِ، حکومت آزاد کشمیر ءِ 8.8 بلین روپئی، 218 ملازم ، 36 گاڈی گدریفینے، بجلی و نت انا مد اٹی سبسڈی کن 23 ارب روپئی فراوانی کن سمری وزارت امور کشمیر وزیراعظم ءِ گدریفینے، زوت دا فنڈ آک ہم حکومت آزاد کشمیر ءِ گدریفنگرہ۔ او سے شنبے نادے آ بنجائی وزیر حوالکاری و شینکاری عطاتارڑ تون اوار پارلیمنٹ ہاؤس آن پیشن میڈیا تون گپ وتران کریکہ۔ بنجائی وزیر امیر مقام پارے کہ آزاد کشمیر نا حالیت آتا بابت معلومدار کننگ کن بسونن۔ وزیراعظم شہباز شریف نا وخت آنوٹس و کارروائی آن برانز چٹانے۔ کشمیر و گلگت بلتستان پاکستان کن بھا زا ہمیت تخرہ، اوفتا ہراتم کہ مشکل بس تو نن حاضر اُن، اوفتا قربانی و پاکستان تون تفنگ نا فیصلہ نا قدر ءِ کینہ۔ اوپارے کہ نن برانز کروک آتا خواست آتیا ترمیم کرسا 7.7 بلین روپئی نا فنڈ ہرا وزارت امور کشمیر و کشمیر کونسل تون ئسر او آزاد کشمیر حکومت آ گدریفینن۔ اسہ ارب پین ہم اوفتے گدریفینن۔ اوفتا خواست آ کشمیر کونسل نا 218 ملازم و 36 گاڈی کشمیر حکومت نا دوٹی تسونن۔
