اسلام آباد۔ 14 مئی (اے پی پی) قومی اسمبلی ءِ پاننگانے کہ فیڈرل ڈائریکٹوریٹ آف ایجوکیشن نا بست وبند اٹی اسکول بس آتا کچ اٹی کمتی کننگتنے بلکن مسکوہی دور اٹی ناکارہ مروک آ بس آتا اول سرآن جوڑ جاڑ ءِ کرسا اوفتے کاریم اٹ اتنگ نا قابل کننگ انگ ءِ۔ سے شنبے نادے آ قومی اسمبلی ٹی قومی اسمبلی نا باسک نوشین افتخار نا اسلام آباد اٹی اسکول بس آتا بندش و دا بس آتیٹی پنک بس پروجیکٹ اٹی بدل کننگ نیز بنجائی دارالحکومت اسلام آباد اٹی خورک آسامی تیا استاد آتا تقرری ءِ کپننگ نا بابت چکاری نوٹس نا ورندی ءِ ترسا بنجائی وزیر تعلیم خالد مقبول صدیقی پارے کہ بس آتے کم کپننگ انگ ءِ بلکن 20 بس آتے جوڑ جاڑ کرسا کچ ءِ پین ودفنگ انگ ءِ۔ چکاری نوٹس آ نوشین افتخار و نزہت صادق نا سوج آتا ورندی ءِ ترسا وزیرتعلیم خالد مقبول صدیقی پارے کہ مسکوہی دور اٹی بھاز انگا بس آتا جوڑ جاڑ مفننگ نا بناآ سلفنگاسس، داسہ اوفتے جوڑ جاڑ کرسا دُوارہ کارمی جوڑ کننگ انگ ءِ ۔ اسہ پین سوج اسے نا ورندی ٹی خالد مقبول صدیقی پارے کہ تعلیمی بشخ اٹی واقعی ایمرجنسی والا حالیت ءِ، وزیراعظم تون ہیت کریسن، دابابت ڈٹ بندی کننگ انگ ءِ، اسمبلی نا باسک آتون اوار ہرخوانوک آ بندغ ءِ مرے کہ ہراتم کہ اوفتے موقع ملے او مخلوق ءِ کار خوانفر۔
