چمن، فاٹا و پاٹا نا حالیت آتیان حکومت پورووڑاٹ معلومدار ءِ، اعظم نذیر تارڑ نا قومی اسمبلی ٹی ورندی

اسلام آباد۔ 14 مئی (اے پی پی) بنجائی وزیر کانود، انصاف وپارلیمانی امور اعظم نذیر تارڑ پارینے کہ چمن ، فاٹا و پاٹا نا حالیت آتیان حکومت پورو وڑاٹ معلومدار ءِ، دا باندات آ باسک آتا کنڈآن مثبت سلاہ تا است انا حب اٹ خیرمقدم ءِ کننگک۔ سے شنبے نادے آ قومی اسمبلی ٹی سنی اتحاد کونسل نا باسک اسد قیصر نا اعتراضی ٹک انا ورندی ٹی بنجائی وزیر کانود، انصاف و پارلیمانی امور اعظم نذیر تارڑ پارینے کہ تدوک آ دے قائد حزب اختلاف آجوئی اٹ ہیت کرے۔ اوورندی ءِ ہم دا تحمل اٹ بایدے بنے، جمہوریت نا زیبائی دادے کہ نن اسہ ایلو ءِ گپ وتران، دلیل انا کمک اٹ قائل کین، ملک انا الس ننے ننا کانود سازی و تینا ویل آتا ایسری کن دانگیا گدریفینے۔ داڑے کتاب آتے اَرینگ و نعرہ خلنگ آن ویل آک ایسر مفسہ، کبینی نا اگہ پیدواری ءِ کیرہ تو اونا ایسراس ہم پاننگے۔ اوپارے کہ 21 می ترمیم آن پد فاٹا وپاٹا ءِ استثنیٰ تننگا، وزیراعظم دا باندات آن پورو وڑاٹ معلومدار ءِ، نن سمجھنہ کہ فاٹا وپاٹا نا الس دہائی اسکان دہشت گردی نا برخلاف جنگ اتون مون تسر، غٹ صوبہ غاک تینا تینا این ایف سی نا بشخ آن اسہ اسہ درسد قربانی تسر ہرا خیبرپختونخوا حکومت ءِ فراوان کننگا۔ دازر ءِ زہمی علاقہ غاتیا خڑچ کننگتو، سینیٹ نا کمیٹی ٹی ہم دا باندات ارے، دا بابت انت کہ سلاہ اس برے ، حکومت است انا حب اٹ اوفتا خیرمقدم ءِ کیک۔ داکان مست اعتراضی ٹک آ سنی اتحاد کونسل نا باسک اسد قیصر پارے کہ تدوک آ دے خواجہ آصف کنا بابت ہیت کریسس، اوپارے کہ نن زور و زبردستی اٹ کس اسے نا ہیت ءِ منپنہ، اسپیکر نا عہدہ شرف نا قابل مریک، غٹ اسپیکر نا چیئرنا شرف ءِ بایدے کیر۔ اوپارے کہ فاٹا و پاٹا ٹی خراج آتا بابت نن چکاری نوٹس ہم جمع کرفینن۔ مسکوہی دور حکومت اٹ دا علاقہ غاتے جنگ انا سوب آن زہمی مننگ نا بناآ خراج آتیان استثنی ٰ تننگا انتئے کہ ہموجاگہ نا زرگزران تباہ حال ءِ، دا علاقہ غاتے جنگ انا سوب آن زہمی مننگ نا بناآ خراج آتیان استثنیٰ تننگا انتئے کہ ہموجاگہ نا زرگزران تباہ حال ءِ، دا علاقہ غاتے ایلو بشخ آتا بریبر تکنگ درست اف، فاٹا وپاٹاآن حکومت ءِ 70 ارب روپئی نا کٹیا مریک، ولے اونا مقابلہ ٹی ہموڑے شونداری کاریم مفننگ ءِ، اگہ ہموڑے خراج لاگو کننگا تو الس اٹ مایوسی و بے روزگاری ودی مریک۔ دا باندات آ خصوصی کمیٹی اس جوڑ کننگے۔ خیبرپختونخوا ٹی ہژدہ ہژدہ گھنٹہ نا لوڈشیڈنگ مننگ ءِ، خیبرپختونخوا حکومت دُزآتے ہلنگ کن پورو کمکاری نا درشانی ءِ کرے۔