نجکاری نا عمل اٹ شفافیتءِ اولیت تننگے، سرکاری ملکیتی ادارہ غاتا نجکاری آن خراج تروک آتا پیسہ غاتا بچت مریک و سروس آتا فراوانی نا آب ءِ گچین کننگ اٹ کمک رسینگک، وزیراعظم شہباز شریف

اسلام آباد۔ 14 مئی (اے پی پی) وزیراعظم محمد شہباز شریف غٹ بنجائی وزارت آتے نجکاری نا بابت المی کارروائی و نجکاری کمیشن تون کمک نا پارت کرسا پارینے کہ نجکاری نا عمل اٹ شفافیت ءِ اولیت تننگے، سرکاری ملکیتی ادارہ غاتا نجکاری آن خراج تروک آتا پیسہ غاتا بچت مریک و ہندا پیسہ غاتیان سروس آتا فراوانی نا آب ءِ گچین کننگ اٹ کمک رسینگک۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او تینا کماشی ٹی وزارت نجکاری و نجکاری کمیشن نا امور نا بابت اہم جاچ دیوان اٹی کرے۔ دیوان اٹی وزیر دفاع  و ہوابازی خواجہ آصف، بنجائی وزیر خزانہ و محصولات محمد اورنگزیب ، بنجائی وزیر واپار جام کمال خان، بنجائی وزیر پاور اویس احمد خان لغاری، بنجائی وزیر نجکاری عبدالعلیم خان وزیر پیٹرولیم مصدق ملک، بنجائی وزیر اقتصادی امور احد خان چیمہ، وزیراعظم نا کوآرڈی نیٹر رانا احسان افضل و تعلقدار بڑزکو سرکاری آفیسر آک بشخ ہلکر۔ دیوان اٹی وزارت نجکاری و نجکاری کمیشن نا کنڈآن نجکاری پروگرام 2024 آن 2029 اسکان نا روڈ میپ پیش کننگا۔ وزیراعظم دیوان نا بناٹی ہی بشخ ہلوک آتیا پیدوار کرے کہ اسٹریٹجک سرکاری ملکیتی ادارہ غاتیان بیدس ایلو غٹ سرکاری ملکیتی ادارہ غاتا نجکاری ءِ کننگک۔ اوپارے کہ بیدس اسٹریٹجک سرکاری ملکیتی ادارہ غاتا ایلو غٹ سرکاری ملکیتی ادارہ چائے او نفع بخش ءُ یا نسخان زدہ اوفتے پرائیویٹائز کننگک۔ دابابت وزیراعظم غٹ بنجائی وزارت آتے دا بابت المی کارروائی و نجکاری کمیشن تون کمک نا پارت کرے۔ اوپارے کہ حکومت نا کاریم کاروبار کننگ اف بلکن کاروبار و زرکاری دوست چاگڑد ءِ پک کننگ و دا بابت آسراتی و آسانی فراوان کننگ مریک۔ اوپارے کہ حکومتی ملکیتی ادارہ غاتا نجکاری آن خراج تروک آتا پیسہ غاتا بچت مریک و ہندا پیسہ غاتیان سروس آتا فراوانی نا آب ءِ گچین کننگ اٹ کمک رسینگک۔ وزیراعظم سخت پارت کرے کہ نجکاری نا عمل اٹ شفافیت ءِ اولیت تننگے۔ اووزیراعظم نا پاکستان انٹرنیشنل ایئرلائنز کمپنی لمیٹڈ نا نجکاری نا بابت بڈنگ تون اوار ایلو اہم ریسہ غاتے ٹیلی ویژن آ براہ راست نشر کننگ نا پارت کرے۔ داکان بیدس وزیراعظم پارے کہ ایلو ادارہ غاتا نجکاری نا عمل نا ریسہ غاتے ہم براہ راست نشر کننگک۔ دیوان ءِ سرکاری ملکیتی ادارہ غاتا نجکاری نا بابت پیش رفت آ سرجمی اٹ حوال تننگا۔ دیوان ءِ پاننگاکہ پی آئی اے نا نجکاری نا بابت پری۔کوالیفکیشن نا عمل مئی نا ایسر اسکان پورو کننگک۔ دیوان ءِ معلومدار کننگا کہ روز ویلٹ ہوٹل نا نجکاری نا بابت المی سلابت نا عمل برجاءِ ۔ دیوان ءِ پاننگاکہ فرسٹ ویمن بینک لمیٹڈ نا متحدہ عرب امارات تون گورنمنٹ ٹو گورنمنٹ ٹرانزیکشن کننگ انگ ءِ۔ دیوان ءِ معلومدار کننگا کہ بجلی تقسیم کار کمپنی تے نجکاری پروگرام 2024-2029اٹی اوار کننگانے۔ دیوان نا بشخ ہلوک آتے پاننگانے کہ نسخان زدہ سرکاری ملکیتی ادارہ غاتے اولیتی بنداوتیا پرائیوٹائز کننگک۔ نجکاری نا عمل ءِ ترند و گچین کننگ کن نجکاری کمیشن اٹ چاہندار آتا پری کوالیفائیڈ پینل تعینات کننگ انگ ءِ۔