اسلام آباد۔ 13مئی (اے پی پی) وزیراعظم محمد شہباز شریف خولم نا ہلنگ اٹ ٹیکنالوجی نا کاریم اٹ اتنگ کن پارت آتیا عمل کپننگ و ڈیوالئی کننگ آ پاسکونا منیجنگ ڈائریکٹر و جنرل منیجر پروکیور منٹ ءِ معطل کننگ نا پارت کرسا پارینے کہ حکومت ملک اٹی غذائی رکھ ءِ پک کننگ کن ہرممکن کوشست کننگ اٹی ءِ، بزغرنا نسخان ءِ اسُل سگپنہ۔ اوداپارت آتے دوشنبے نادے آ خولم نا طلب و رسد و بنجائی حکومت نا ہلنگ نا پروگرام نا بابت اسہ بڑزکو کہولی دیوان اسے نا کماشی ءِ کرسا کرے ۔ دیوان اٹی بنجائی وزیرخزانہ و محصولات محمد اورنگزیب ، بنجائی وزیر قومی غذائی رکھ و پٹ وپول رانا تنویر حسین، بنجائی وزیر اقتصادیات احدخان چیمہ، بنجائی وزیر واپار جام کمال خان، وزیر مملکت انفارمیشن ٹیکنالوجی شزا فاطمہ خواجہ، وزیراعظم نا کوآرڈینیٹر رانا احسان افضل و تعلقدار بڑزکو سرکاری آفیسر آک بشخ ہلکر۔ دیوان نا بشخ ہلوک آتیان گپ وتران کرسا وزیراعظم پارے کہ بزغرآتا شونداری و شونہالی کن پبی گام گیج کننگک۔ اومستی پارے کہ حکومت ملک اٹی غذائی رکھ انا بابت ہرممکن کوشست کننگ اٹی ءِ۔ وزیراعظم اَرفے کہ خولم نا ہلنگ نا عمل کن موبائل ایپلی کیشن تیار انت اکن کرفنگتو؟ وزیراعظم خولم ہلنگ نا عمل اٹی ٹیکنالوجی نا کاریم اٹ اتنگ نا بابت پارت آتیا عمل کپننگ و دا بابت ڈیوالئی کننگ آپاسکو نا منیجنگ ڈائریکٹر و جنرل منیجر پروکیورمنٹ ءِ معطل کننگ نا پارت کرے۔ وزیراعظم تاکید کرے کہ خولم نا ہلنگ ناعمل ساف و شفاف کننگ نا بابت ٹیکنالوجی نا کاریم اٹ اتنگے و دا چرجوئی ٹی موبائل فون ایپلی کیشن اس تیار زوت آن زوت تیار کننگے۔ اوپاسکو نا اسٹاک نا تھرڈ پارٹی آڈٹ کرفنگ نا ہم پارت کرے۔ وزیراعظم مستی پارت کرے کہ بزغر نا زرگزرانی رکھ اکن اجناس نا انشورنس ءِ پک کننگے۔ داکان بیدس وزیراعظم پاسکو ءِ چار لکھ میٹرک ٹن ودکی خولم نا شفاف و گچین وڑاٹ ہلنگ نا ہم پارت کرے۔ وزیراعظم پارے کہ بزغرنا نسخان ءِ اسُل سگپنہ۔ وزیراعظم پارے کہ گچین کارکڑد نشان تروک آ پاسکو ہند و آفیسر آتے گچین کننگک و اوفتا حکومتی کہول آ پذیرائی ءِ کننگک۔
