پاکستان اٹی پیشن نا زرکاری کن سازگار چاگڑد فراوان کننگ کن سنبرینگوک اُن، وزیراعظم ناانٹرویو

اسلام آباد۔ 13مئی (اے پی پی) وزیراعظم محمد شہباز شریف زرگزران نا بحالی ءِ اولیت و سعودی عرب تون تعلقداری ءِ دنیا کن درور اس گوندسا پارینے کہ پاکستان اٹ پیشن نا زرکاری کن سازگار چاگڑد اس فراوان کننگ کن سنبرینگوک اُن، جم قومی پیدوار اٹی ودکی کن پوسکن آٹیکنالوجی نا کاریم اٹ اتنگ آن اصلاحات اتنگ اُن، کرپشن نا چٹفنگ کن گام گیج کننگ انگ ءِ، سعودی عرب تون بڑزکو کہول ساڑی آ رابطہ غاتیان زرگزران اٹی گچینی بریک۔ داخیال آتا درشانی ءِ او العربیہ نیوز چینل ءِ تروک آ خصوصی انٹرویو ٹی کرے۔ وزیراعظم پارے کہ پاکستان و سعودی عرب نا تعلقداری کیہی دہائی تیا تالان ءِ، پاکستان و سعودی عرب نا تعلقداری نا دنیا ٹی درور اف، ہڑتوم آ ایلم ملک آتا غم وخوشی ٹی اسٹ ءِ۔ وزیراعظم پارے کہ کنا سعودی عرب نا ساڑی آ دورہ بےکچ سرسہب مس۔ سعودی ولی عہد محمد بن سلمان تدوک آ 8 سال آتیٹی بے مٹ ءُ سرسہبی دوئی کرینے ہرا اونا مدبرانہ فراست و مثالی سرکڑدہ غاتا سوب آن ہی ممکن مننگ کرینے۔ وزیراعظم محمد شہبا ز شریف پارے کہ شہزادہ محمد بن سلمان نا مملکت نا وژن 2030دنیا کن اسہ مثالی ءُ ماڈل اسے۔ سعودی عرب تون بڑزکو کہول انا ساڑی آ رابطہ غاتیان زرگزران اٹی گچینی بریک۔ اوپارے کہ پاکستان نا وزیراعظم اسے نا غٹ آن اولیکو سعودی عرب نا دورہ اسہ روایت اس مسنے۔ سعودی وزیرخارجہ و بڑزکو زرکاری ڈل انا دورہ ءِ پاکستان اسہ پوسکن ءُ مزل نانشان اس مریک۔ وزیراعظم پارے کہ حکومت پاکستان نا اولیکو اولیت زرگزران نا بحالی ءِ۔ کویت، متحدہ عرب امارات ، قطر، ترکی و چین اتون تعلقداری نا پین سوگوی کن سنبرینگوک اُن۔ سنگت ملک آتون ہڑتوم آ کنڈآتا تعلقداری و واپارءِ مون آ دننگ ءِ۔ پاکستان اٹ پیشن نا زرکاری کن سازگار چاگڑد اس فراوان کننگ کن سنبرینگوک ءِ۔ ننا حکومت نا اولیکو اولیت زرگزران نا بحالی ءِ۔ وزیراعظم پارے کہ ملک ءِ سنگین چیلنج مون تروک ءِ، کرپشن نا چٹفنگ کن گام گیج کننگ اُن، پیشن نا وام تیان نجات و ملک اٹی زرکاری ءِ مون آ دننگ اُن۔ جم قومی پیدوار اٹی ودکی کن پوسکن آ ٹیکنالوجی نا کاریم اٹ اتنگ آن اصلاحات درستی راستی کرفنگ انگ ءِ۔