اسلام آباد۔ 13 مئی (اے پی پی) وزیراعظم شہباز شریف پارینے کہ پاکستان و سویلی کوریا نا نیام اٹ خاص کر واپار و زرکاری نا بابت بھلو رابطہ اس ارے، پاکستان کوریا نا صنعت، چنکا کچ انا صنعت آتا شونداری، آئی ٹی و آرٹیفیشل انٹیلی جنس نا بشخ آتیٹی آزموندہ غاتیان فائدہ ہرفنگ نا خواہندار ءِ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او پاکستان اٹ سویلی کوریا نا سفیر پارک کی جون تون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی سویلی کوریا نا سفیر وزیراعظم ءِ کوریا نا سرکڑدہ غاتا کنڈآن ارٹ میکو وار وزارت عظمیٰ نا منصب ءِ سنبھالنگ آمبارکبادی تس۔ وزیراعظم سویلی کوریا نا سرکڑدہ غاتا تہنیتی کلہو نا منت واری ءِ ہرفے و ہڑتوم آ کنڈآتا تعلقداری تے پین سوگو کننگ کن اواری اٹ کاریم کننگ نا است خواہی نا درشانی ءِ کرے۔ وزیراعظم پارے کہ پاکستان و سویلی کوریانا نیام اٹ تعلقداری خاص کر واپار وزرکاری نا بابت بھلو رابطہ اس ارے، اوپارے کہ ہڑتوم آملک آک 1960 نا دہائی نا اول آن ہی اقتصادی شونداری کن کمکاری نا بناءِ کریر۔ وزیراعظم سویلی کوریانا زرگزران اٹی پوسکن آٹیکنالوجی نا کمک اٹ رونما مروک آنمان بدلی نا ستا ءِ کرے۔
