حاجی تے حج مقدس آ سرمننگ کن حج فلائٹ آپریشن چارشنبے و پنچ شنبے نا نیامی نن آن بناکیک

اسلام آباد۔ 08 مئی (اے پی پی) حاجی تے حج مقدس آ سرمننگ کن حج فلائٹ آپریشن چارشنبے و پنچ شنبے نا نیامی نن آن بناکیک ہرا اسہ تُو اسکان برجاسلک۔ وزارت مذہبی امور نا رداٹ حج 2024 کن فلائٹ آپریشن 9 مئی آن 9 جون ااسکان برجاسلک، اولیکو 15 دے غٹ جہاز براہ راست مدینہ منورہ غا سرمریرہ، 24 مئی آن 9 جون گیشتر جہاز جدہ بالی پٹ آ دڑنگرہ، فلائٹ آپریشن نا اولیکو دے 11 جہاز آتا کمک اٹ 2160 حاجی سعودی عرب آ روانہ مریرہ۔ اسلام آباد آن 3 جہاز آتا کمک اٹ 680 حاجی  سعودی عرب آ روانہ مریرہ، کراچی آن 02 جہاز آتا کمک اٹ 330 مسافر روانہ مریرہ، لاہور آن 03 جہاز آتا کمک اٹ 670 مسافر روانہ مریرہ۔ ترجمان پارے کہ ملتان آن اِرا جہاز آتا کمک اٹ 329 حاجی سفر حج انا بناءِ کیرہ، سیالکوٹ آن اسہ جہاز اسے نا کمک اٹ 151 حاجی مدینہ منورہ غا سرمریرہ، کوئٹہ غان اولیکو حج جہاز 11 مئی آ روانہ مریک۔ سکھر آن اولیکو حج جہاز 27 مئی آ روانہ مریک۔ 259 حج جہاز آتا کمک اٹ 68 ہزار آن زیات سرکاری حاجی سعودی عرب آ سرمریرہ۔ ترجمان پارے کہ حج فلائٹ آپریشن 9 جون آ ایسر مریک وخت اس کہ 20 جون آ اولیکو جہاز حاجی تے ہرفسا وطن آ پدی سرمریک۔ یات سلے کہ برجاسال اسلام آباد و کراچی نا بالی پٹ آتیان روڈ ٹو مکہ پروجیکٹ نا آسراتی فراوان کننگانے۔ ہرانا رداٹ پاکستانی حاجی تا دا بالی پٹ آتیا ہی سعودی امیگریشن نا عمل ءِ پورو کننگک۔ سرکاری اسکیم نا رداٹ 67 ہزار آن زیات پاکستانی حج انا فرض انا سعادت ءِ دوئی کیرہ۔