وزیراعظم شہباز شریف تون ازبکستان نا وزیرخارجہ نا اوڑدہی، واپار، زرگزران، سیکورٹی، دفاع، راجی رابطہ و ایلو بشخ آتیٹی کمکاری ءِ ودفنگ آ گپ وتران

اسلام آباد۔ 08 مئی (اے پی پی) وزیراعظم محمد شہباز شریف تون ازبکستان نا وزیر خارجہ بختیار سیدوف اوڑدہی کرے ہراٹی واپار، زرگزران، سیکورٹی ، دفاع، راجی رابطہ و ایلو بشخ آتیٹی تین پہ تینی کمکاری ءِ ودفنگ آ گپ وتران کننگا۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ اوڑدہی ٹی وزارتِ عظمیٰ نا منصب آ ارٹ میکو وار گچین مننگ آ مبارکبادی ترسا ازبک وزیرخارجہ ازبکستان نا صدر شوکت مرزیوئیف نا کنڈآن وزیراعظم محمد شہباز شریف ءِ ازبکستان نا دورہ نا سلہ خلک۔ وزیراعظم ازبکستان نا صدر شوکت مرزیوئیف نا منت واری ءِ ہرفے و پارے کہ او اوڑتون اوڑدہی نا چاری ءِ۔ اوڑدہی ٹی ہڑتوم آ راہشونک پاکستان و ازبکستان نا نیام اٹ واپار، زرگزران، سیکورٹی ،دفاع، راجی رابطہ و ایلو بشخ آتیٹی کمکاری ءِ ودفنگ آ گپ وتران کرے۔ اوڑدہی ٹی اوغانستان اٹی دیرپا امن و شونداری نا اہمیت آ ہم گپ وتران کننگا۔ وزیراعظم محمد شہباز شریف ازبکستان تون ہڑتوم آ کنڈآتا واپار و ایلو ڈٹ آتے ترندی اٹ پورو کننگ کن پاکستان نا عزم انا درشانی ءِ کرے۔ اوازبکستان ءِ پاکستانی  بندرگاہ تسکان رسینگ فراوان کننگ کن تین پہ تینی سلابت اٹ اسہ گچین لائحہ عمل اس ٹہیفنگ نا اہمیت آ زور شاغا۔ اوازبکستان۔اوغانستان۔پاکستان ریلوائی ڈٹ انا اہمیت ءِ مون آتخسا اونا زوت پوروی کن پاکستان نا عزم انا درشانی ءِ ہم  کرے۔