اسلام آباد۔ 08 مئی (اے پی پی) وزیراعظم محمد شہباز شریف تکنیکی و فنی تعلیم ءِ اسہ وڑ کننگ و پیشن نا ملک پاکستانی افرادی قوت ءِ گچین روزگار کن پاکستان اسکل کمپنی و اسکل ڈویلپمنٹ فنڈ انا ٹہیفنگ و تکنیکی و فنی تربیت نا بشخ اٹی اصلاحات کن کمیٹی اس جوڑ کننگ ناپارت کرینے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم تینا کماشی ٹی وزارت امور سمندر پار پاکستانی و شونداری ا فرادی قوت و نیشنل ووکیشنل اینڈ ٹیکنیکل ٹریننگ کمیشن نا بابت بڑزکو کہولی جاچ دیوان اٹی کرے۔ دیوان اٹی بنجائی وزیر احدخان چیمہ، خالد مقبول صدیقی، وزیر مملکت شزہ فاطمہ خواجہ، چیئرمین وزیراعظم یوتھ پروگرام رانا مشہوداحمد خان ، وزیراعظم نا کوآرڈی نیٹر رانااحسان افضل، قومی کوآرڈی نیٹر خصوصی زرکاری سہولت کونسل لیفٹیننٹ جنرل سرفراز احمد، ڈپٹی چیئرمین پلاننگ کمیشن جہانزیب خان و تعلقدار بڑزکو کمامدارآک بشخ ہلکر۔ دیوان اٹی وزیراعظم ءِ این اے وی ٹی ٹی سی نا پاکستان اٹی افرادی قوت نا تکنیکی و فنی تربیت نا بابت گام گیج آتا بارواٹی پاننگا۔ دیوان ءِ پاننگاکہ این اے وی ٹی ٹی سی برجاسال 60 ہزار بندغ آتے تکنیکی و فنی تربیت فراوان کیک وخت اس کہ اصلاحات پورو مننگ آن پد بروک آ مسہ سال اٹی کل 6 لکھ بندغ آتے تکنیکی و فنی تربیت نا فراوانی ءِ پک کننگک۔ دیوان ءِ پاننگاکہ تکنیکی و فنی تربیت کن نئے بیرہ پیشن ناملک آتیان روزگار نا وارخواہی و درکار کسب نا معلومدار ی نا تبادلہ ءِ پک کننگ انگ ءِ بلکن ہندی صنعت آن ہم دا بابت افرادی قوت نا کھپت نا ڈیٹا ءِ دوئی کننگک۔ دیوان ءِ مستی پاننگاکہ این اے وی ٹی ٹی سی تکنیکی و فنی تربیت نا جہانی آب ءِ پک کننگ کن جہانی آب انا شہرت یافتہ ادارہ غاتیان طالب علم آتا سرٹیفکیشن ءِ المی گوندانے۔ دیوان ءِ مستی پاننگاکہ وزیراعظم نا پارت نا رداٹ گلگت بلتستان و آزاد کشمیر نا ورناتیکن نئے بیرہ بنجائی کہول آ کوٹہ جتا کننگانے بلکن اوفتا خصوصی تربیت کن جتا پروگرام اس بناکننگ انگ ءِ ہرانا بنابرجاسال جون اٹی مریک ۔ دیوان ءِ وزارت امور سمندر پار پاکستانی و شونداری افرادی قوت نا بابت ہم سرجمی اٹ حوال تننگا و اصلاحات آ سلاہ و سوج ہم پیش کننگا۔ وزیراعظم این اے وی ٹی ٹی سی و وزارت امور سمندر پار پاکستان و شونداری افرادی قوت نا اصلاحات آدمدستی سلاہ سوج مرتب کننگ کن دمدستی وڑاٹ اسہ کمیٹی اس جوڑ کننگ نا پارت کرے۔ دیوان اٹی وزیراعظم وزارت امور سمندر پار پاکستانی و شونداری افرادی قوت و این اے وی ٹی ٹی سی ٹی اصلاحات نا فیصلہ کرینے و پارت کرینے کہ ملک گیر تکنیکی و فنی تعلیم ءِ اسہ وڑ کننگ و پیشن نا ملک پاکستانی افرادی قوت نا گچین روزگار کن پاکستان اسکل کمپنی جوڑ کننگے۔ وزیراعظم پاکستان اسکل ڈویلپمنٹ فنڈ انا دمدستی جوڑ کننگ، پاکستان اسکل کمپنی و پاکستان اسکل ڈویلپمنٹ فنڈ انا جوڑ کننگ آ دمدستی وڑاٹ کاریم نا بناءِ کننگ نا پارت ہم کرے۔ وزیراعظم پارت کرے کہ پاکستان نا ورناک افرادی قوت ءِ جہانی آب انا تکنیکی و فنی تربیت نا فراوانی ءِ پک کننگ کن این اے وی ٹی ٹی سی ءِ پین فعال کننگے۔ غٹ تکنیکی بشخ آتیٹی جہانی شہرت یافتہ و جہانی سرٹیفکیشن آتے پک کننگے۔ وزیراعظم مستی پارت کرے کہ پاکستانی افرادی قوت نا شونداری و تکنیکی و فنی تعلیم نا آب ءِ جہانی کہول آ اتنگ کن بنجائی ادارہ صوبہ غاتون رابطہ وکمکاری ءِ پک کیر و گچین و جہانی آب انا کسبی تکنیکی کسب آن شپ افرادی قوت کن ریگیولیشن نا مربوط نظام اس جوڑ کننگے۔
