اقوام متحدہ ٹی پاکستان نا آخبتی مندوب نا جنرل اسمبلی ٹی شرہ ٹی گپ وتران

اقوام متحدہ۔ 07 مئی (اے پی پی) پاکستان پیشن نا خلاٹی سلہہ غاتا خلنگ ءِ توننگ کن گام گیج کننگ نا خواست کرسا داہیت آ زور شاغانے کہ دا گام جہانی امن و سلامتی کن بھلا خطرہ غاتا چٹفنگ کن المی ءِ۔ اقوام متحدہ ٹی پاکستان نا آخبتی مندوب منیر اکرم 193 باسکی جنرل اسمبلی ٹی روس انا ویٹو آ شرہ ٹی گپ وتران کرسا پارے کہ ساڑی آ سال تیٹی پیشن نا خلاٹی و اوڑآن سلامتی ءِ مون تروک  خطرہ غاتیٹی ترندی اٹ ودکی مسنے۔ دا خلاٹی سلہہ غاتا خلنگ و اودے مونی جنگ آتا پڑ جوڑ کننگ نا بابت بھلا واکدار آتا فوجی پالیسی و نظریہ غاتیان پاش مننگ ءِ۔ تدوک آ تُو امریکہ و جاپان پیشن نا خلاٹی سلہہ غاتا رُمب ءِ توننگ نا بابت اسہ قرارداد اس سلامتی کونسل اٹی پیش کریسس ہرادے روس ویٹو کریسس وخت اس کہ چین دا قرارداد آ رائے شماری ٹی بشخ ہلتویسس۔ داکان بیدس سلامتی کونسل نا غٹ 13 باسک آک قرارداد نا حق ٹی وونٹ تسوسر۔ پاکستانی مندوب دا وخت آپارے کہ ہندا قراراد داہیت انا اعتراف ءِ کہ پیشن نا خلاٹی سلہہ غاتا رُمب انا توننگ جہانی امن و سلامتی کن بھلو خطرہ اسے چٹفک۔ اوپیشن نا خلانا بابت معاہدہ نا اہمیت آ زور شاغا و داہیت انا درشانی ءِ کرے کہ سلہہ غاتا چٹفنگ آ جنیوا ٹی جوڑ کانفرنس سلہہ غاتا چٹفنگ آ اسٹ انگا کثیر الجہتی مذاکراتی فورم ءِ۔