زرگزرانی ٹک آک مثبت ءُ، جہانی جریدہ ہم پاکستان نا زرگزران نا ستاءِ کننگ ءِ، پنشن اصلاحات آ سلاہ بٹنگانن، بنجائی وزیر حوالکاری عطاء اللہ تارڑ

اسلام آباد۔ 07 مئی (اے پی پی) بنجائی وزیر حوالکاری و شینکاری عطاء اللہ تارڑ پارینے کہ زرگزرانی ٹک آک مثبت ءُ، جہانی جریدہ ہم پاکستان نا زرگزران نا ستاءِ کننگ اٹی ءِ، پنشن اصلاحات آ سلاہ بٹنگانن، ہراتم سلاہ تے گڈیکو دروشم اس تننگک تو میڈیا و الس ءِ معلومدار کننگک۔ سے شنبے نادے آ داڑے پی ٹی وی ہیڈکوارٹرزاٹی وزیرخزانہ محمد اورنگزیب و وزیرکانود اعظم نذیر تارڑ  تون اوار پریس کانفرنس آن تران کرسا بنجائی وزیر حوالکاری پارے کہ ملک تاریخ نا ہموموڑآ سلوک ءِ ہراڑے اصلاحات المی ءِ۔ اوپارے کہ زرگزران سہی کنڈآ ہِننگ ءِ، زرگزران نا بابت غٹ ٹک آک مثبت ءُ، غٹ جہانی جریدہ غاک پاکستانی زرگزران نا بابت گام گیج آتا ستاءِ کننگ اٹی ءُ ہرا داہیت انا شاہدی ءِ کہ زرگزرانی ٹک آک مثبت مننگ تون اوار اوار سد درسد سہی ہم اریر۔ بنجائی وزیر حوالکاری پارے کہ وزیراعظم اقتدار ءِ سنبھالنگ آن پد غٹ آن مست خڑچ آتیٹی کمتی نا ہیت ءِ کرے، حکومت ہراڑے ریونیو ٹی ودکی کن گام گیج کرے ہموڑے خڑچ آتیٹی کمتی ہم کرے۔ پنشن اصلاحات نا بارواٹی اوپارے کہ تدوک آ منہ ہفتہ غان میڈیا غا پنشن اصلاحات نا بابت قیاس آرائی کننگ انگ ءِ و اودے پین ادارہ اسے تون منسوب کننگ انگ ءِ۔ اوپارے کہ پنشن اصلاحات نا بابت سلاہ بٹنگ انگانے، دا سلاہ تیا سجفنگک۔ اوپارے کہ غلط گمانی و قیاس آرائی تیان بچنگ کن ننا کوشست ءِ کہ انت کہ باندات اس کابینہ، حکومت یا فورم اسے آ زیر غور بس، اودے میڈیانا مون آ تخنگے تانکہ اوڑآ جوان سلاہ بننگ کے، ہندا وڑ نن پروپیگنڈا و فیک نیوز آن ہم بچنگ کینہ۔ بنجائی وزیر پارے کہ ملازم آتا سروس نا وخت ءُ پاس ءِ ودفنگ نا بابت سلاہ تیا سجفنگ انگ ءِ، ہراتم دا سلاک گڈیکو دروشم اس اختیار کیرہ تو میڈیا و الس ءِ معلومدار کننگک۔