سعودی کمپنیک چندی بشخ آتیٹی زرکاری نا جاچ ءِ ہلکنو، سعودی ڈل دورہ نا پیش رفت آن ولی عہد محمد بن سلمان و ایلوکمامدارآتے معلومدار کیک، وزیراعظم نا بنجائی کابینہ نادیوان اٹی گپ وتران

اسلام آباد۔ 07 مئی (اے پی پی) وزیراعظم محمد شہباز شریف سعودی عرب نا کاروباری ڈل انا سرسہب دورہ ءِ ملکی زرگزران کن اہم ءُ مزل نا نشان اس گوندساپارینے کہ سعودی کمپنیک چندی بشخ آتیٹی زرکاری نا جاچ ءِ ہلکنو، سعودل ڈل انا پاننگ ئس کہ نن پاکستان اٹ اسہ پوسکن ءُ دوراس خنانن، ڈل انا سروک پاکستانی کمامدارآتا تیاری آن بے حد زہمی مس، ڈل دورہ نا پیش رفت آن سعودی ولی عہد محمد بن سلمان و ایلو تعلقدار کمامدارآتے معلومدار کیک۔ داخیال آتا درشانی ءِ او بنجائی کابینہ نا دیوان اٹی گپ وتران کرساکرے۔ وزیراعظم پارے کہ سعودی عرب نا کاروباری ڈل پاکستان نا دورہ ءِ کرینے و پاکستان نا مہمانداری نا است انا حب اٹ اعتراف ءِ کرینے۔ سعودی ڈل انا سروک ہراوڑاٹ پاکستانی کمامدارآتا ستاءِ کرے اوڑآن بھاز خوشی مسنے و ایلم ملک سعودی عرب نا ڈل ہراگرم جوشی نا درشانی ءِ کرے او کنکن گمرنا سوب ءِ۔ سعودی ڈل چندی بشخ آتیٹی زرکاری نا بابت وزیر آتا تیاری نا بھاز ستاءِ کرے۔ اودورہ غا بھاز است جمی نا درشانی ءِ کرینے و پارینے کہ او بھاز خوشی اٹ پدی ہِننگ ءُ و پدی سعودی عرب آ ہنسا پارہ کہ نن پاکستان اٹ اسہ پوسکن ءُ دوراس خنانن۔ داڑے ننا بزنس ٹو بزنس اوڑدہی مس۔ پاکستانی کمامدارآک سعودی ڈل ءِ پبی وڑاٹ پریزینٹیشنز تسر ہراکہ ننکن بھاز است بڈی نا ہیت اسے۔ سعودی ڈل دورہ نا پیش رفت آن سعودی ولی عہد محمد بن سلمان و ایلوکمامدارآتے معلومدار کیک۔ وزیراعظم دورہ ءِ سرسہب کننگ کن بنجائی وزیر واپار، بنجائی وزیر پیٹرولیم ، بنجائی وزیرخزانہ، بنجائی وزیر ہوابازی و بنجائی وزیر بجلی تون اوار تعلقدار سیکرٹری و وزارت آتا بھلو اہم ءُ کڑد اس مسنے، اوفتا گچین کوشست ستاکڑزک ہراڑآ اوفتے مبارکبادی ایتیوہ۔ اوپارے کہ دا دورہ ءِ سرسہب کننگ اٹ کڑد ادا کروک آکمامدارآتا اسہ دیوان اس بٹنگانن، دااسہ بھاز اہم ءُ دے اس ئس۔