حج مبارک آ روانگی آن مست ویکسی نیشن نا عمل ءِ پورو کرفر، وزارت مذہبی امور نا حاجی تے پارت

اسلام آباد۔ 06 مئی (اے پی پی) وزارت مذہبی امور حاجی تے پارت کرینے کہ حج مقدس آ روانگی آن مست ویکسی نیشن نا عمل ءِ پورو کرفر، سعودی عرب اٹی پوشکن آ کارڈ ءِ چیک کننگک۔ وزارت نا ترجمان نا رداٹ ملک انا 10 حاجی کیمپ آتیٹی پولیو، بھلا اِل و نزلہ و زکام آن بچنگ کن ویکسی نیشن کننگ انگ ءِ۔ غٹ حاجیک حج مقدس آ روانگی آن مست تینا ویکسی نیشن ءِ پورو کیر تانکہ سعودی عرب اٹی اوفتے مشکل آتون مون تروئی تمپ۔ ترجمان نا رداٹ برجاسال کراچی بالی پٹ آ ہم روڈ ٹو مکہ پروجیکٹ نا آسراتی فراوان کننگانے ہرانا کمک اٹ پاکستانی حاجی تا کراچی بالی پٹ آ امیگریشن نا عمل  ءِ پورو کننگک۔ آسراتی اسلام آباد نا بالی پٹ آ داآسراتی مہالو آن ساڑی ءِ۔ کراچی بالی پٹ آ روڈ ٹو مکہ نا آسراتی نا فراوانی کن غٹ بست وبند آتے گڈیکو دروشم تننگانے۔ سعودی وزارت داخلہ نا کنڈآن کراچی و اسلام آباد نا بالی پٹ آتیا تعیناتی کن امیگریشن نا عملہ ہم سرمسنے۔ وزارت مذہبی امور حاجی تے پارینے کہ تینا حج گفٹ جہاز آن 5 دے مست حاجی کیمپ آتیان ہلیر۔ جہا زآن 2 دے مست بیرہ گروپ لیڈر یا اونا نمائندہ گروپ نا پاسپورٹ ، ٹکٹ، شناختی لاکٹ، موبائل سم و بیگ سٹکرز پین پین اکن حاجی کیمپ آ ہِننگ کیک ولے اوڑتون گروپ ممبرآتا اصل شناختی کارڈ و بینک رسید پین پین المی مرے۔ بینک بوتھ آن ذاتی خڑچ اکن سعودی ریال ہم ہلنگ نا آسراتی ساڑی مریک۔