سیالکوٹ۔ 06 مئی (اے پی پی) بنجائی وزیر آک سیالکوٹ بالی پٹ آ پیشن نا ملک ہنوک آ مسافر آتیکن ساڑی آسراتی تیا است جم مفننگ نا درشانی ءِ کرسا پاریر کہ بالی پٹ آ مسافر آتا آسانی کن آسراتی فراوان کننگے۔ بنجائی وزیر داخلہ و انسداد منشیات محسن نقوی و بنجائی وزیر دفاع و ہوابازی خواجہ محمد آصف سیالکوٹ بالی پٹ انا 2 گھنٹہ اسکان جوانی اٹ دورہ ءِ کریر ہراٹی اوفک بال پٹ آ ہن و بر ٹرمینل آتیا مسافر آتیکن آسراتی تا جاچ ءِ ہلکر۔ بنجائی وزیر آک سیالکوٹ بالی پٹ آ مسافر آتا آسانی کن آسراتی تے ودفنگ نا پرمان کریر ۔ بنجائی وزیر داخلہ محسن نقوی بالی پٹ بندش اٹی ہی امیگریشن کاؤنٹرآتے ودفنگ نا پرمان کرے۔ بنجائی وزیر خواجہ محمد آصف پارےکہ مسافر آتا آسراتی کن سرچ انا عمل ءِ آسان کننگانے۔ سیالکوٹ بالی پٹ آ اے این ایف، کسٹمز و اے ایس ایف مسافر آتے 3 ہند آخا بلکن اسہ ہی جاگہ غا چیک کیرہ۔ وزیر داخلہ نا پاننگ ئس کہ امیگریشن نا 12 کاؤنٹر بالی پٹ دُوارہ ملنگ آ بایدے فعال مریر۔ بالی پٹ انا بندش اٹی مسافر آتیکن پین آسراتی تا فراوانی نا عمل ءِ پورو کننگے۔ مسافر ننا شرفمند آمہمانک ءُ۔ اوفتے زیات آن زیات آرام و آسانی تننگ زمواری ءِ۔ بنجائی وزیر آک سیالکوٹ بالی پٹ آ امیگریشن کاؤنٹر و ایلو آسراتی تا کاریم ءِ 15 دے پورو کننگ کن تعلقدار کمامدارآتے پارت تسر۔ چیف ایگزیکٹیو آفیسر سیالکوٹ ایئرپورٹ ایئر وائس مارشل ریٹائرڈ تنویر اشرف بھٹی، اینٹی نارکوٹکس فورس پنجاب نا بریگیڈیئر سکندر، ایف آئی اے گوجرانوالہ زون نا ڈائریکٹر ساجد اکرم و بالی پٹ منیجر نثاراحمد و تعلقدار کمامدارآک ہم داوخت آ ساڑی ئسر۔
