نائب وزیراعظم و وزیرخارجہ محمد اسحاق ڈار نا گیمبیاٹی جموں وکشمیر آ اوآئی سی رابطہ گروپ نا دیوان آن تران

بنجول۔ 06 مئی (اے پی پی) نائب وزیراعظم و وزیرخارجہ محمد اسحاق ڈار پارینے کہ آزادکشمیر نا بارواٹی بھارتی راہشون تا اشتعال انگیز بیان و بلاجواز دعویٰ علاقائی امن کن بھلو خطرہ اسے ءُ، بھارت کشمیری تے تینا گل زمین اٹی اسہ بے اختیار کمیونٹی اسے ٹی بدل کننگ کن کوشست و کشمیری الس ءِ سجفوک وڑاٹ اوفتا بنداوی حق و آجوئی آن محروم کننگ ءِ۔ دفترخارجہ نا کنڈآن دوشنبے نادے آ جاری بیان نا رداٹ داخیال آتا درشانی ءِ او گیمبیا نا شار بنجول اٹی 15 می اسلامی سروکی دیوان نا وخت آ جموں وکشمیر نا بارواٹی اوآئی سی رابطہ گروپ آن تران کرساکرے۔ دیوان اٹی بھارت نا غیرکانودی وڑاٹ کوزہ ٹی جموں وکشمیر اٹی سیاسی و سیکورٹی چاگڑد و علاقہ ٹی انسانی حق انا بھلاحالیت آتا ہم جاچ ءِ ہلنگا۔ اوآئی سی نا اسسٹنٹ سیکرٹری جنرل سیاسی امور و سیکرٹری جنرل نا خصوصی ایلچی جموں وکشمیر یوسف الدوبے نا کماشی ٹی مروک آ دیوان اٹی رابطہ گروپ نا باسک ملک پاکستان، سعودی عرب، ترکی ، نائیجیریاو آذربائیجان نا نمائندہ غاک ساڑی ئسر۔ کشمیری الس نا حقی نمائندہ غاتا ڈل و اوآئی سی نا آزاد آخبتی انسانی حق کمیشن نا بڑزکو کمامدارآک ہم داوخت آ ساڑی ئسر۔ بیان نا رداٹ نائب وزیراعظم و وزیرخارجہ محمد اسحاق ڈار دیوان اٹی پاکستانی ڈل انا کماشی ءِ کرے۔ داوخت آ او رابطہ گروپ ءِ کشمیری تے تینا گل زمین اٹی اسہ بے اختیار کمیونٹی اسے ٹی بدل کننگ کن بھارت نا برجاکوشست آتیان معلومدار کرے۔ اودیوان ءِ پارے کہ بھارت سجفوک وڑاسے اٹ کشمیری الس ءِ اوفتا بنداوی حق و آجوئی آن محروم کننگ ءِ۔ اوپارے کہ بھارتی کمامدارآک اختلاف رائے ءِ لتاڑنگ کن بھارت نا غیرکانودی کوزہ ٹی جموں وکشمیر اٹی خوف و بھیم نا چاگڑد ودی کرینے۔ نائب وزیراعظم محمد اسحاق ڈار جہانی برادری آ زور شاغانے کہ او آزاد کشمیر نا بارواٹی بھارتی راہشون تا اشتعال انگیز بیان و بلاجواز دعویٰ تا نوٹس ءِ ہلے ہراکہ علاقائی امن کن بھلو خطرہ اسے۔ اوداہیت آ ہم زور شاغا کہ بھارت غٹ سیاسی بندوی تے یلہ کے، کالعدم سیاسی ججماعت آتیان پابندی تے ہرفے، 5 اگست 2019 نا غیرکانودی و اسہ کنڈی گام گیج و اوکان پد انا گام گیج ہرافتا مسخت آبادیاتی بدلی و سیاسی انجینئرنگ ءِ، ءِ منسوخ کے و اقوام متحدہ نا سلامتی کونسل نا  تعلقدار قرارداد آتیا عملدرآمد کے۔ بیان نا رداٹ چندی باسک ملک آتا ڈل آک او آئی سی نا ایجنڈاٹی جموں وکشمیر نا جھیڑہ نا اہمیت نا ذکر ءِ کرسا اقوام متحدہ نا سلامتی کونسل نا رداٹ کشمیری تا ناقابل تنسیخ حق خودارادیت دوئی کننگ کن روا جہد نا مخ تفی نا درشانی ءِ کرے۔ او جموں وکشمیر نا زوت و پرامن ایسری آ زور شاغا۔