سعودی عرب تون چندی بشخ آتیٹی  تعلقداری واپاری، اقتصادی و زرکاری رابطہ غاتے مون آ دننگ نا خواہندار اُن، بنجائی وزیر پٹرولیم نا پاکستان سعودی عرب زرکاری فورم آن تران

اسلام آباد۔ 06 مئی (اے پی پی) بنجائی وزیر پیٹرولیم وفوکل پرسن پاک سعودی شریداری ڈاکٹر مصدق ملک سعودی زرکارآتے پاکستان اٹ چندی بشخ آتیٹی زرکاری نا وارخواہی تیان فائدہ ہرفنگ نا سلہ خلسا پارینے کہ نن سعودی عرب تون چندی بشخ آتیٹی تعلقداری واپاری، اقتصادی و زرکاری رابطہ غاتے مون آ دننگ نا خواہندار اُن، تین پہ تینی تعلقداری تے پین فائدہ ئی  کننگ کن گام گیج کروئی مریک، زرکاری نا کسر اٹ داسہ ہچ ءُ اڑاند اسے اِلیپنہ، ہڑتوم آملک آتا نجی بشخ آک اواری اٹ مون آ کار و زرگزرانی شونداری نا سفر اٹ ننادُو ءِ سبک کیر۔ اوداخیال آتا درشانی ءِ دوشنبے نادے آ داڑے اسلام آباد اٹی پاکستان سعودی عرب زرکاری فورم 2024 نا بنائی دیوان آن تران کرسا کرے۔ ڈاکٹرمصدق ملک پارے کہ پاکستان و سعودی عرب نا نیام اٹ تاریخی برادرانہ تعلقداری ءِ، ننے اواری اٹ مون آہِننگ نا گرج ءِ ، ننتون لائخی ءُ ورناارے ہر املک انا شونداری ٹی اہم ءُ کڑد اس ادا کننگ کیرہ وخت اس کہ ہندا وڑ سعودی عرب نا اسلامی قدر آ تالان فعال سوسائٹی ءِ۔ اوپارے کہ سعودی عرب ساڑی آ سال تیٹی ترندی اٹ شون ہلکنے، پاکستان تون کسبکار افرادی قوت  نا ہچ ءُ کمتی اس اف، پاکستان نا کسب کار و چاہندار بندغ آک سعودی عرب نا شونداری ٹی پبی کڑد ادا کننگ اٹی  ءُ۔ اوپارے کہ پاکستان قدرتی وسیلہ و معدنیات آتیان شپ ءِ وخت اس کہ سعودی عرب اٹی تیل انا بھلو کوڑی اس ارے۔ پاکستان سعودی عرب ءِ تینا بھلا ایلم تکک، پاکستان نا الس نا سعودی عرب تون روحانی و قلبی لگاؤ ءِ، نن سعودی عرب تون چندی بشخ آتیٹی تعلقداری واپاری اقتصادی و زرکاری رابطہ غاتے مون آ دننگ نا خواہندار اُن۔ اوپارے کہ پاکستان اٹی چندی بشخ آتیٹی زرکاری نا بھلو وارخواہی ا س ارے، گوادر نابندرگاہ آخبت اٹ مچ آ دنیا کن واپاری راہداری نا مرکز جوڑ مننگ والا ءِ۔ پاکستان اٹ سیل و سوات نا ہم بےپناہ وارخواہی ارے، ننا قطبی علاقہ جاٹ نا مسحور کن قدرتی ندارہ و زیبائی نا دنیا ٹی درور ملیپک، حکومت سیل و سواتی تے ہروڑنا آسراتی تا فراوانی کن کوشست کننگ ءِ، ہڑتوم آ ملک آتا نجی بشخ آک اواری اٹ سیل و سوات ءِ مون آ دننگ اٹ اسہ ایلو تون کمک کننگ کیرہ۔ اوپارے کہ ملک اٹی خصوصی زرکاری سہولت کونسل نا رداٹ زرکاری  ءِ مون آ دننگ نا اسہ ہندن ءُ فورم اس ساڑی ءِ ہرانا سوب خیسن آ فیتہ نا اڑاند آک داسہ چٹانو، و زرکارآتے ہروڑنا آسراتی و آسانی فراوان کننگ انگ ءِ، داسہ ریڈٹیپ انا جاگہ غا ریڈ کارپٹ ءِ درستی راستی کرفنگانے، اوپارے کہ وزیراعظم و حکومت نا عزم ءِ کہ درملکی یا ہندی زرکارآتا کسر اٹ داسہ اڑاند مننگ کن اِلنگ پننگک۔ اوپارے کہ کاروبار اٹ آسانی ودی کرسا ہی کاروبار ءِ مون آ دننگ مریک و دا چرجوئی ٹی ساڑی حکومت پبی کوشست کننگ اٹی ءِ۔