اسلام آباد۔ 03 مئی (اے پی پی) وزیراعظم محمد شہباز شریف پارینے کہ پاکستان و سعودی عرب نا نیام اٹ متکن آ ایلمی تعلقداری ءِ ہرا دہائی تیا تالان ءُ، پاکستان خوش بخت ءِ ہرادے سعودی عرب کون آ خیرخواہ ءُ سنگت اس ارے، اومیت ءِ کہ پاکستان نا دورہ ءِ کروک آ سعودی ڈل اتون پاکستانی کاروباری شخصیت آتا اوڑدہی بھرمی مریک۔ وزیراعظم آفس نا میڈیا ونگ آن جاری بیان نا رداٹ داخیال آتادرشانی ءِ او تینا کماشی ٹی سعودی عرب نا پاکستان اٹی زرکاری و ڈٹ آتیا پیش رفت نا بابت بڑزکو کہولی جاچ دیوان اٹی کرے۔ دیوان اٹی بنجائی وزیر جام کمال خان، محمد اورنگزیب، احد خان چیمہ، عطاء اللہ تارڑ، رانا تنویر حسین، ڈاکٹر مصدق ملک، عبدالعلیم خان، سردار اویس خان لغاری، وزیر مملکت شزہ فاطمہ خواجہ، خصوصی کمکار طارق فاطمی ، ڈپٹی چیئرمین پلاننگ جہانزیب خان ، وزیراعظم نا کوآرڈی نیٹر رانا احسان افضل، ایس آئی ایف سی نا قومی کوآرڈینیٹر لیفٹیننٹ جنرل سرفراز و تعلقدار بڑزکو کمامدار آک بشخ ہلکر۔ دیوان ءِ وزیراعظم نا دورہ ءِ سعودی عرب نا بارواٹی سرجمی اٹ معلومدار کننگ تون اوار اوار سعودی عرب نا کاروباری ڈل انا اسلام آباد آ بننگ و گمانی بشخ آتیٹی زرکاری نا بابت معلومدار کننگا۔ وزیراعظم دیوان اٹی بشخ ہلوک آتے تینا ساڑی آ دورہ ءِ سعودی عرب نا بابت معلومدار کرے۔ دیوان ءِ سعودی عرب نا کنڈآن کاروباری شخصیت آتا بڑزکو کہولی ڈل انا بروک آ منہ دے اٹی دورہ ءِ پاکستان نا بارواٹی معلومدار کننگا۔ دیوان اٹی وزیراعظم پارے کہ سعودی سرکڑدہ غاتا کنڈآن پاکستان اٹ زرکاری نا مون آ دننگ و پاکستان نا شونداری و شونہالی کن گام گیج آتیا کنتون اوار مچ آ قوم سعودی سرکڑدہ غاتا منت وار ءِ۔ دورہ ءِ سعودی عرب نا گچین تیاری کن غٹ تعلقدار وزیر و آفیسر آتا کوشست ستاکڑزک۔ سعودی سرکڑدہ غاک پاکستان نا شونداری و شونہالی کن ہروڑنا کمکاری نا سلہ خلکر، ہراستاکڑزک۔ وزیراعظم پارت کرے کہ سعودی ڈل انا گچین مہمانداری ءِ کننگے۔ اوپارے کہ اومیت ءِ سعودی ڈل اتون پاکستانی کاروباری شخصیت آتا اوڑدہی بھرمی مریک۔ وزیراعظم پارے کہ پاکستان و سعودی عرب نا نیام اٹ متکن آ ایلمی تعلقداری ءِ ہرا دہائی تیا تالانءِ۔ پاکستان خوش بخت ءِ ہرادے سعودی عرب کون آ سنگت خیرخواہ ارے۔ وزیراعظم پارے کہ سعودی فرمانرواعزت مآب سلمان بن عبدالعزیز و سعودی ولی عہد و وزیراعظم محمد بن سلمان پاکستان اٹی زرکاری نا مون آ دننگ و اونا شونداری و شونہالی ٹی بھاز است خواہی تخرہ۔
