اسلام آباد۔ 03 مئی (اے پی پی) بنجائی وزیر داخلہ و انسداد منشیات محسن نقوی و بنجائی وزیر ایوی ایشن و دفاع خواجہ محمد آصف علامہ اقبال ایئرپورٹ لاہور نا 2 گھنٹہ مرغن ءُ دورہ اس کریر۔ بنجائی وزیر آک بالی پٹ آ مسافر آتیکن ساڑی آسراتی تیا است جم مفننگ نا درشانی ءِ کریر۔ بنجائی وزیر داخلہ محسن نقوی امیگریشن نا ویل آتا دمدستی ایسری و مسافر آتیکن آسراتی تے ودفنگ، پٹنگ نا عمل ءِ آسان و ترند کننگ نا عمل ءِ آسان و ترند کننگ نا پرمان کرسا اے ایس ایف ، اے این ایف و کسٹمز آن پلان طلب کرے۔ بنجائی وزیر قابل عمل پلان بروک آ 24 گھنٹہ ٹی تیار کرسا پیش کننگ نا پارت کرے۔ وزیر ہوابازی خواجہ محمد آصف پارے کہ لاہور بالی پٹ آ سرسہب آزموندہ غان پد سرچ انا عمل ءِ ایلو بالی پٹ آتیا ہم شروع کننگک۔ بالی پٹ آتیا مسافر آتا ہن و بر ءِ آسان کننگ کن تعلقدار ادارہ غاتے دمدستی گام گیج کننگ نا گرج ءِ۔ وزیرداخلہ محسن نقوی پیشن نا ملک بننگ و روانگی ٹرمینل آ امیگریشن نا کاؤنٹرآتیٹی ودکی نا پرمان ہم کرے۔ اونا پاننگ ئس کہ مسافر آتے انتظار نا زحمت آآن بچفنگ کن دمدستی وڑاٹ امیگریشن کاؤنٹرآتا کچ ءِ ودفنگے، 3 دے اٹی امیگریشن کاؤنٹرآتیٹی ودکی نا گڈیکو پلان پیش کننگے، امیگریشن کاؤنٹر آتا ودنگ آن مسافر آتے مرغن ءُ انتظار اسے آن نجات ملک۔ محسن نقوی پارے کہ مسافر آتے زیات آن زیات آسراتی فراوان کننگ کن آ وٹ آف باکس گام گیج کننگے۔ بنجائی وزیر آک امیگریشن کاؤنٹرآتیا مسافر آتیکن بست وبندآتا جاچ ءِ ہلکر۔ بنجائی وزیر آ ک اے این ایف، اے ایس ایف و کسٹمز نا سرچ انا عمل نا مشاہدہ ءِ ہم کریر۔ بنجائی وزیرآک بالی پٹ آ مسافر آتیکن ساڑی آسراتی تا جاچ ءِ ہلکر۔ بنجائی وزیر آتا کماشی ٹی ایئرپورٹ نا کانفرنس روم اٹی دیوان اس اڈہلک۔ بنجائی وزیر آتے بالی پٹ آ مسافر آتا آسراتی کن گام گیج آتا بارواٹی حوال تننگا۔ بنجائی وزیر آک تعلقدار کمامدارآتے مسافر آتیکن آسراتی تے ودفنگ کن المی پارت ایتر۔ ڈپٹی ڈی جی سول ایوی ایشن اتھارٹی، اے این ایف نا کرنل شوکت، ایف آئی اے لاہور نا ڈائریکٹر سرفراز ورک، اے ایس ایف، کسٹمز و علامہ اقبال انٹرنیشنل ایئرپورٹ نا بڑزکو کمامدارآک دیوان اٹی بشخ ہلکر۔
